ފިރިންގެ ތެރެއިން ގިނަބައެއްގެ ޝަކުވާއަކީ މަސައްކަތް ނިމިގެން އެނބުރި ގެއަށް ދިއުމުން ހިތްހަމަޖެހުން ނުލިބޭކަމުގެ ޝަކުވާއެވެ. އެމީހުންނަށް އަހުރެން ބުނެލަން އޮތީ ގެއަށް ވަދެ ފުރަތަމަ ހޭދަކުރާ 5 މިނިޓް މިކަންކަމަށް ސަމާލުކަންދީފިނަމަ ފެންނަ މަންޒަރު މުޅިންތަފާތުވާނެ ކަމަށެވެ.
ފުރަތަމަ ކަމަކީ ގެއަށް ވަންނަން ދޮރުހުޅުވުމުގެ ކުރިން ކޮނޑުގައި ހުރި ހުރިހާ ބުރަތަކެއް ބަންޑުންކޮށް ހުސްކޮށްލައި ހަމަޖެހިލައިގެން ގެއަށް ވަނުމެވެ. ތިބާ ގެއަށް ގެންދިއަ މައްސަލަތަކުގެ ބުރަ އުފުލަންޖެހޭނީ ގޭގައިތިބި އަނބިދަރިންނަށް ކަމަށްނުވާއިރު އެމީހުންނަށް އެއްވެސް ބުރައެއް އުފުލަން ނުޖެއްސުވުމަށެވެ.
ދެވަނަ ކަމަކީ ގެއަށް ވަންނަންވާނީ ޛިކުރު ކިޔައި ސަލާމްގޮވަމުންނެވެ. ހިނިތުންވެގެން ހުރެއެވެ. ގޭގައި ތިބި މީހުންނަށް ބަލަމުންނެވެ. އެއީ ތިބާގެ ސަމާލުކަން އެމީހުންނަށްއެބައޮތްކަން އެންގުމަށެވެ. އެކަމުގެ ހިތްހަމަޖެހުން އެމީހުންނަށް ހޯދައިދިނުމަށެވެ.
ތިންވަނަ ކަމަކަށް އަނބިދަރިންނާއި ބައްދަލުވުމުން ދައްކަންޖެހޭ ވާހަކަތައް ދައްކައި އަދި އެމީހުންގެ ވާހަކަތައް އަޑުއަހައި ނިމެންދެން ފޯނުގައި އަތްނުލައި ދުރުގައި ބާއްވާށެވެ.
ހަތަރުވަނަ ކަމަކަށް ދެމަފިރިންގެ މެދުގައި ހުރި މައްސަލަތކުގެ ވާހަކަ އެވަޤުތު ނުދައްކާށެވެ. އެއީ ޝަކުވާކުރުމުގެ ވަޤުތެއް ނޫނެވެ. ހަދަންޖެހޭނީ އެއީ ހިތްހަމަޖެހުމާއި އުފާވެރިކަމުގެ ވަޤުތުކޮޅަކަށެވެ. އެކަކު އަނެކަކަށް ބައްދައިލުމުގެ އިތުރަށް ދަރިންގެ ގައިގަވެސް ބައްދާލަންވާނެއެވެ.
ފަސްވަނަ ކަމަކަށް ދުވަހު ގޭތެރޭގެ ކަންކަން ދިއަ ގޮތާއިމެދު އަނބިމީހާއާއި ސުވާލުކުރާށެވެ. އަނބިމީހާ ދޭ ޖަވާބުވެސް ރަނގަޅަށް އަޑުއަހަންވާނެއެވެ.
މިއީ މާގިނަ ވަޤުތުތަކަކަށް ބޭނުންވާނެ ކަންކަމެއް ނޫނެވެ. ދާދިކުޑަކުޑަ ވަޤުތުކޮޅެއްގެ ތެރޭގައި ނިމިގެންދާނެ ކަންކަމެވެ. ޤަވާއިދުކޮށް ކުރަން ސަމާލުކަންދޭނަމަ ޢާންމުގޮތެއްގައި ބޭނުންވާނީ އެންމެ ފަސްމިނިޓެއްހައި އިރެވެ.
ޢަޖުމަ ބަލައިލަން ނަމަވެސް ގެއަށް ދެވޭ ވަޤުތު ނިކަން މިގޮތަށް ކަންކަންކޮށްބަލާށެވެ. އަހުރެން ބުނާނީ ނުލިބިގެން ތިއުޅޭ ހުރިހާ ހިތްހަމަޖެހުމެއް ލިބޭނެއެވެ. ހުރިހާ ކަންބޮޑުވުންތަކެއް ފިލައިގެންދާނެއެވެ. އިން ޝާ ﷲ
- ތަޖުރިބާކާރު ޢިލްމްވެރިއެއްގެ ވާހަކަފުޅަކުން
- މިއަދުނޫސް
