ވާޖިބު އަދާކުރަމުން ދަނިކޮށް ނިޔާވާ ފުލުހުންގެ އާއިލާތަކަށް ފުލުހުންގެ ޚިދުމަތުން ބޭސްފަރުވާގެ އިންތިޒާމު ހަމަޖައްސައިދޭ ގޮތަށް ކަމާބެހޭ ޤަވާއިދު އިސްލާހުކޮށްފިއެވެ.
އަލަށް ގެނައި އިސްލާހުގެ ދަށުން، ވާޖިބު އަދާކުރުމުގެ ތެރޭގައި ނިޔާވާ ފުލުހުންގެ ޖަނާޒާ، ފުލުހުންގެ އެގްޒެކެޓިވް މެނޭޖްމަންޓު ބޯޑުން ނިންމާ ގޮތެއްގެ މަތިން ވަކި ރަސްމިއްޔާތެއްގެ ގޮތުގައި ބޭއްވުމަށް ވަނީ ހަމަޖެހިފައެވެ.
މީގެއިތުރުން، ޝަރަފުވެރިކަމާއެކު ރިޓަޔާކުރާ ފުލުހުންނަށް ދޭ އިނާޔަތްތައް ހިސާބުކުރުމުގައި މީގެކުރިން އޮތް ލިމިޓު ބަދަލުކޮށް، އެ މީހަކު ޚިދުމަތްކުރި މުއްދަތަށް ބަލައި އިނާޔަތް ހަމަޖެއްސުމަށް ވެސް ވަނީ ނިންމާފައެވެ.
ހަމައެއާއެކު، 25 އަހަރަށް ފަހު ރިޓަޔާކުރާ ފުލުހުންނަށް، ޚިދުމަތުގައި ދެމިތިބޭ ފުލުހުންނެކޭ އެއްފަދައިން ބޭސްފަރުވާގެ އެންމެހައި އިންތިޒާމުތައް ހަމަޖައްސައިދިނުމަށް ވެސް މި ގެނައި ބަދަލުތަކުގެ ތެރޭގައި ހިމަނާފައިވެއެވެ.
