އަމީނީ މަގުގައި މަރާމަތުކުރި ސަރަޙައްދުގެ މަސައްކަތް ނިންމައި، އަންނަ އާދިއްތަ ދުވަހު އާއްމު ދަތުރުފަތުރަށް ހުޅުވާލާނެކަމަށް ބިނާރާއި ގެދޮރުވެރިކަމާ ޢުމްރާނީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ.
އަމީނީ މަގުގައި ހަލާކުވެފައިވާ ސަރަހައްދުތައް މަރާމާތުކުރުމުގެ މަސައްކަތް އެމްޓީސީސީއާ ހަވާލުކޮށްފައިވަނީ މި އަހަރުގެ ޖޫން މަހުގެ 15 ވަނަ ދުވަހުއެވެ. މި މަޝްރޫޢުގެ މަސައްކަތް ކުރިއަށްގެންދަނީ ސެގްމަންޓްތަކަކަށް ބަހާލައިގެންނެވެ.
އެގޮތުން އަންނަ އާދިއްތަ ދުވަހު ދަތުރުފަތުރަށް ހުޅުވާލުމަށް ތައްޔާރުވެފައިވަނީ ސެގްމަންޓް 1 ގެ ގޮތުގައި ހިމެނޭ، ދިވެހިރާއްޖޭގެ އަޑުން ފަށައިގެން ދަރުމަވަންތަ ހޮސްޕިޓަލާ ހަމައަށް އޮތް ސަރަހައްދެވެ.
ބިނާރާ ބެހޭ ވުޒާރާއިން މައުލޫމާތު ދެއްވާގޮތުގައި ސެގްމަންޓް 2 ގެ ގޮތުގައި ހިމެނޭ، ދިވެހިރާއްޖޭގެ އަޑު ކުރިމަތިން އޮންނަ ހަތަރުއަނގޮޅި ކަންމަތީގައި ތާރު އެޅުމުގެ މަސައްކަތްވެސް މިހާރު ވަނީ ނިންމާފައެވެ. މި މަސައްކަތުގެ ތެރެއިން އެ ސަރަޙައްދުތަކުގައި ކުރިން އަޅާފައިވާ ތާރުގަނޑު ނަގާ، މަގުގެ އަޑީގެ ނެޓްވޯކްތައް އަލުން ތަރުތީބުކޮށްފައިވެއެވެ.
ތާރުއެޅުމުގެ ސިލްސިލާ މަސައްކަތްތައް ނިމި، މިހާރު ކުރިއަށްދަނީ މަގުގައި ޓްރެފިކް ނިޝާންތައް ކުރެހުމާއި ފިނިޝިންއާ ގުޅޭ އެހެނިހެން މަސައްކަތްތަކެވެ. އެންމެހާ މަސައްކަތްތައް ނިންމައި އާދިއްތަ ދުވަހު މަގު ހުޅުވާލާއިރު، ދެން އެންމެ އަވަހަށް ފެށުމަށް ހަމަޖެހިފައިވަނީ ސެގްމަންޓް 3 ގެ މަސައްކަތެވެ. ސެގްމަންޓް 3 ގެ ދަށުން މަރާމާތުކުރާނީ އިއްޒުއްދީން މަގާ ހަމައިން ފެށިގެން ކޯރުކެނޑި ހިނގުމާ ހަމައަށް އޮންނަ ސަރަޙައްދެވެ.
