ރާއްޖޭގެ މައި ވިޔަފާރި ބަނދަރު، މާލޭ ވިޔަފާރި ބަނދަރުގެ ޙާލަތު ބަދަލުކޮށް ޒަމާނީ ކުރުމަކީ ރާއްޖޭގެ އިޤްތިޞާދީ ތަރައްޤީއާ އެންމެ ބޮޑަށް ގުޅިފައިވާ އެއް މަޝްރޫޢު ކަމަށާއި، އެތައް ޒަމާނެއް ވަންދެން ބަދަލެއް ނުއައިސް އޮތް އެ ބަނދަރުގެ ޙާލަތު ބަދަލުކުރެއްވުމުގެ ޢަމަލީ މަސައްކަތްޕުޅު ފައްޓަވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަމަށް އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވަޒީރު ސަޢީދު ވިދާޅުވީ، މާލޭ ވިޔަފާރި ބަނދަރު ޒަމާނީކޮށް، މިއަދުގެ އިޤްތިޞާދީ ހަޤީޤަތްތަކާ ފައިހަމަކުރުމާއި، ވިޔަފާރީގެ ކާރުބާރު ހަލުވިކޮށް ފަސޭހަކޮށްދިނުމުގެ ޚިޔާލު މީގެ އެތައް އަހަރެއް ކުރިން ކަމާބެހޭ އިދާރާތަކުން ކުރަމުން ދިޔަ ކަމަށެވެ. ނަމަވެސް، އެތައް ޒަމާނެއް ވެގެން ދިޔައިރުވެސް ރާއްޖޭގެ މައި ބަނދަރު އޮތީ އެންމެ ފުރަތަމަ މާލޭގައި އެ ބަނދަރު ޤާއިމްކުރި މިންވަރަށް ކަމަށާއި، އެ ތަނަށް ގެނެވިފައިވަނީ ވަރަށް ކުދިކުދި ތަރައްޤީތައް ކަމަށް ވަޒީރު ފާހަގަކުރެއްވިއެވެ.
ވަޒީރު ސަޢީދު ވިދާޅުވި ގޮތުގައި، އެ ޙާލަތު ބަދަލުކުރެއްވުމަށް އިސްނަންގަވައި، އެކަމުގެ ޢަމަލީ މަސައްކަތްޕުޅު ފައްޓަވައިދެއްވީ ރައީސް ޑރ. މުޙައްމަދު މުޢިއްޒެވެ. އަދި ބަނދަރުގެ މަޝްރޫޢުގެ އިތުރުންވެސް، ޤައުމުގައި ހުރި މިފަދަ އެތައް ބޮޑެތި މައްސަލަތަކެއް ރައީސް މުޢިއްޒު ގެންދަވަނީ ހިކުމަތްތެރިކަމާއެކު ޙައްލުކުރައްވަމުން ކަމަށް ސަޢީދު ވިދާޅުވިއެވެ.
މީގެއިތުރުން، ދުނިޔޭގެ މަސްރަޙަށް އަންނަ އެކި ބަދަލުތަކާއި އިޤްތިޞާދީ ގޮންޖެހުންތަކުގެ ތެރޭގައި ޤައުމު ނިކަމެތިވެގެން ދާން ދޫކޮށްލައިގެން ތިބެވެން ނެތްކަން ރައީސް މުޢިއްޒު ހިތްވަރާއެކު ސާބިތުކޮށްދެއްވަމުން ގެންދަވާކަން ވަޒީރު ފާހަގަކުރެއްވިއެވެ. އަދި ވެރިއެއްގެ ޒިންމާއަކީ ހުރަސްތަކާއި އުނދަގޫތަކާ ކުރިމަތިލައްވައި، އިޙްލާސްތެރި މަސައްކަތްޕުޅުތަކެއް ކުރައްވައިގެން އެ ޙާލަތުން ޤައުމު މިންޖުކޮށްދެއްވުންކަން ރައީސް މުޢިއްޒު ކަށަވަރުކޮށްދެއްވަމުން ގެންދަވާ ކަމަށްވެސް ވަޒީރު ސަޢީދު ވިދާޅުވިއެވެ.
