ތުރުކީވިލާތުގެ އިސްތަންބޫލްގައި ބޭއްވުމަށް ހަމަޖެހިފައިވާ 11 ވަނަ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ހަލާލް އެގްޒިބިޝަން އަދި 12 ވަނަ ވޯލްޑް ހަލާލް ސަމިޓުގައި ބައިވެރިވުމުގެ ފުރުސަތު ދިވެހި ވިޔަފާރިތަކަށް ހުޅުވާލައިފިއެވެ.
މި އަހަރުގެ ނޮވެންބަރު 25 އިން 28 އަށް އިސްތަންބޫލްގައި ކުރިއަށްދާ މި ބައިނަލްއަޤްވާމީ މައުރަޒުގައި ރާއްޖޭގެ ކުންފުނިތަކާއި، ހަލާލް ވިޔަފާރީގެ ދާއިރާގައި ހަރަކާތްތެރިވާ ފަރާތްތަކުން ބައިވެރިވުމަށް މައުރަޒު އިންތިޒާމުކުރާ ފަރާތުން ދަޢުވަތު އަރުވާފައިވާކަން ތުރުކީވިލާތުގެ ސަރުކާރުން ވަނީ ހާމަކޮށްފައެވެ.
ވިޔަފާރިއާބެހޭ ވުޒާރާއިން މަޢުލޫމާތު ދެއްވާގޮތުގައި، މި ހަރަކާތުގެ މުހިންމު އެއް ލަނޑުދަނޑިއަކީ މި ސިނާއަތުގައި ހަރަކާތްތެރިވާ ވިޔަފާރިވެރިންނާއި، އިންވެސްޓަރުންގެ އިތުރުން ސަރުކާރާއި އަމިއްލަ ފަރާތްތަކަށް ވިޔަފާރީގެ ގުޅުން ބަދަހިކުރުމުގެ ފަހި ޕްލެޓްފޯމެއް ފޯރުކޮށްދިނުމެވެ.
މި މައުރަޒުގެ ތެރެއިން ހަލާލް ކާބޯތަކެތި، ކޮސްމެޓިކްސް، ފައިނޭންސް، ފެޝަން، ޓޫރިޒަމް އަދި ހެލްތްކެއާ ފަދަ ދާއިރާތަކުގެ އާ އުފެއްދުންތައް ދައްކާލުމުގެ ފުރުސަތު ލިބިގެންދާނެއެވެ. އަދި އިންވެސްޓްމަންޓްތަކާއި އެކްސްޕޯޓް އިތުރުވެ އިޤްތިޞާދީ ކުރިއެރުމަށް ބޮޑު ބާރަކަށް ވެގެންދިއުމުގެ އިތުރުން، ސިނާއަތުގެ މުހިންމު މައުޟޫތަކަށް އަމާޒުކޮށްގެން ބާއްވާ ކޮންފަރެންސްތަކާއި ޕެނަލް ޑިސްކަޝަންތަކުން މައުލޫމާތާއި ތަޖުރިބާ ބަދަލުކުރުމުގެ ފުރުސަތުތައް ފަހިވެގެންދާނެއެވެ.
މި މައުރަޒާއި ސަމިޓުގައި ބައިވެރިވުމަށް ޝައުގުވެރިވާ ފަރާތްތަކުން، ރަސްމީ ވެބްސައިޓް މެދުވެރިކޮށް އޮންލައިން އެޕްލިކޭޝަން ފުރިހަމަކުރުމަށްފަހު، އެ މައުލޫމާތު [email protected] އަށް އީމެއިލް ކުރެއްވުމަށް ވިޔަފާރިއާބެހޭ ވުޒާރާއިން ވަނީ އެދިވަޑައިގެންފައެވެ.
