ދިވެހި ވަޠަނީ ޚިދުމަތުގެ ޕްރޮގްރާމް ފުރިހަމަކުރި ބައިވެރިންގެ ތެރެއިން 400 އެއްހާ ޒުވާނުންނަށް މިހާރު ވަޒީފާ ހަމަޖެހިފައިވާކަމަށް ދިފާޢީ އަދި ވަޠަނީ ޚިދުމަތާ ބެހޭ ވަޒީރުގެ ނައިބު ފާތިމަތު މިޒުނާ ވިދާޅުވެއްޖެއެވެ.
ދައުލަތުގެމީޑިއާއަށް މައުލޫމަތުދެއްވަމުން މިޒުނާ ވިދާޅުވީ، ވަޠަނީ ޚިދުމަތުގެ ޕްރޮގްރާމް ނިންމި ކުދިންގެ ތެރެއިން 543 ކުއްޖަކު ވަޒީފާއަށް އެދިފައިވާ ކަމަށެވެ. އަދި އޭގެ ތެރެއިން 400 އަށްވުރެ ގިނަ ކުދިންނަށް ވަޒީފާ ހަމަޖެހިފައިވާއިރު، އިތުރު ކުދިންނަށްވެސް ވަޒީފާ ހޯދައިދިނުމުގެ މަސައްކަތް ކުރަމުންދާ ކަމަށް އޭނާ ފާހަގަކުރެއްވިއެވެ.
"އެކުދިންނަށް ކެރިއަރ ގައިޑެންސްގެ ފުރުޞަތުތައް ފަހިކޮށްދީ، ކުދިން ބޭނުންވާ ދާއިރާތަކުން އެކަށީގެންވާ ވަޒީފާތައް ދިނުމަށް ވަރަށް ބޮޑަށް ބަލަން. ގުޅިގެން މަސައްކަތް ކުރަން އެނގޭ، ދީނީ ވާޖިބުތަކަށް އިސްކަންދޭ، ނަފްސާނީގޮތުން ދުޅަހެޔޮ، އަދި އަމިއްލަ ކަންކަން މެނޭޖްކޮށްގެން އުޅެވޭނެފަދަ ކުދިންނަށް އެބަހަދާލެވޭ. ވަޒީފާގެ މާހައުލަށް ނުކުންނަން ބޭނުންވާ ފަންނީ ހުނަރުތައް ދަސްކޮށްދެވޭ،" މިޒުނާ ވިދާޅުވިއެވެ.
މިޒުނާ އިތުރަށް ވިދާޅުވީ، ދިވެހި ވަޠަނީ ޚިދުމަތުގެ ޕްރޮގްރާމުގެ މައިގަނޑު މަޤުޞަދަކީ ޤައުމާއި ދީންދެކެ ލޯބިވާ، އަމިއްލަ ނަފްސަށް އިތުބާރުކުރާ، އަދި އަނެކުންނަށް އިހުތިރާމްކުރާ ޖީލެއް ބިނާކުރުން ކަމަށެވެ. މިއީ ދިރިއުޅުމުގެ ހުނަރުތަކާއި އިސްލާމީ ރިވެތި އަޙްލާޤު އަށަގަންނުވައި، ނަފްސާނީ އަދި ޖިސްމާނީގޮތުން ޒުވާނުން ބާރުވެރިކޮށްދިނުމަށް ކުރިއަށްގެންދެވޭ މުހިންމު ޕްރޮގްރާމެއްކަން އޭނާ ފާހަގަކުރެއްވިއެވެ.
މީގެއިތުރުން، ޤައުމާ ހަވާލުވާންތިބި ޒުވާނުން ދީނީ ކަންކަމަށް އަހުލުވެރިކުރުވުމަށާއި ޤައުމީ ކަންކަމުގައި ހޭލުންތެރިކަން އިތުރުކުރުމަށް ބޮޑު އިސްކަމެއް ދެވޭކަން ފާހަގަކުރައްވަމުން، މިއީ މިހާ ފުޅާކޮށް ޒުވާނުން ބިނާކުރުމަށް ކުރިއަށްގެންދެވޭ ފުރަތަމަ ޕްރޮގްރާމް ކަމަށްވެސް މިޒުނާ ވިދާޅުވިއެވެ.
ސަރުކާރުން މިހާރު ދަނީ ދިވެހި ވަޠަނީ ޚިދުމަތުގެ ޕްރޮގްރާމް މިހާރަށްވުރެ ފުޅާކޮށް ކުރިއަށްގެންދިއުމަށް މަސައްކަތް ކުރަމުންނެވެ.
