މިދިޔަ މަހުގެ 24 ވަނަ ދުވަހުގެ ނިޔަލަށް ޓެކުހުގެ ގޮތުގައި ދައުލަތަށް ލިބުނު އާމްދަނީ 23.3 ބިލިޔަން ރުފިޔާއަށް އަރައި، ދައުލަތުގެ ޖުމްލަ އާމްދަނީ ފަސް އިންސައްތަ އިތުރުވެއްޖެއެވެ. މި އަދަދަކީ ވޭތުވެދިޔަ އަހަރުގެ މި މުއްދަތާ އަޅާބަލާއިރު ފާހަގަކޮށްލެވޭ ކުރިއެރުމެކެވެ.
މާލީ ކަންކަމާއި ސަރުކާރު ކުންފުނިތަކާބެހޭ ވުޒާރާއިން އެންމެފަހުން އާންމުކުރި ވީކްލީ ފިސްކަލް ޑިވެލޮޕްމަންޓްސް ރިޕޯޓުގެ ތަފާސްހިސާބުތަކުން ދައްކާ ގޮތުގައި، މިދިޔަ މަހުގެ 24 ގެ ނިޔަލަށް އާމްދަނީއާއި ހިލޭ އެހީގެ ގޮތުގައި ދައުލަތަށް ޖުމްލަ 30.2 ބިލިޔަން ރުފިޔާ ވަނީ ލިބިފައެވެ. މިދިޔަ އަހަރުގެ މި މުއްދަތުގައި އާމްދަނީއާއި ހިލޭ އެހީގެ ގޮތުގައި ލިބިފައިވަނީ 28.7 ބިލިޔަން ރުފިޔާއެވެ. އެހެންކަމުން މިއީ 5 އިންސައްތައިގެ ކުރިއެރުމެކެވެ.
މާލީ ވުޒާރާއިން ފާހަގަކުރެއްވި ގޮތުގައި، މި މުއްދަތުގައި ދައުލަތުގެ އާމްދަނީއަށް ކުރިއެރުން ލިބުނު މައިގަނޑު ސަބަބަކީ ޓެކުހުގެ ގޮތުގައި ލިބުނު އާމްދަނީ އިތުރުވުމެވެ. އެގޮތުން ޓެކްސް އާމްދަނީގެ ގޮތުގައި ލިބުނު 23.3 ބިލިޔަން ރުފިޔާއަކީ، މިދިޔަ އަހަރުގެ މި މުއްދަތުގައި ލިބުނު 21.3 ބިލިޔަން ރުފިޔާއާ އަޅާބަލާއިރު 9.4 އިންސައްތައިގެ ކުރިއެރުމެކެވެ.
ޓެކްސް އާމްދަނީގެ ތަފްސީލުތަކަށް ބަލާއިރު، ޓޫރިޒަމް ދާއިރާގެ ޖީއެސްޓީ (ޓީޖީއެސްޓީ) ގެ ގޮތުގައި ލިބުނު އާމްދަނީ ވަނީ 7.6 ބިލިޔަން ރުފިޔާއިން 7.8 ބިލިޔަން ރުފިޔާއަށް އިތުރުވެފައެވެ. މިއީ 2.7 އިންސައްތައިގެ ކުރިއެރުމެކެވެ. މީގެއިތުރުން އާންމު މުދަލާއި ޚިދުމަތުގެ ޓެކްސް (ޖީއެސްޓީ) ގެ ގޮތުގައި ލިބުނު އަދަދު 3.6 ބިލިޔަން ރުފިޔާއިން 4.1 ބިލިޔަން ރުފިޔާއަށް އަރައި، 10.7 އިންސައްތައިގެ ކުރިއެރުމެއް ވަނީ ލިބިފައެވެ. އަދި އިމްޕޯޓް ޑިއުޓީގެ ގޮތުގައި ލިބުނު އާމްދަނީ 2.1 ބިލިޔަން ރުފިޔާއިން 2.4 ބިލިޔަން ރުފިޔާއަށް އުފުލި، 13 އިންސައްތައިގެ އިތުރުވުމެއް ވަނީ ރެކޯޑުކުރެވިފައެވެ.
ޓެކުހުގެ އާމްދަނީއަށް އެދެވޭ ކުރިއެރުމެއް ލިބުނު ނަމަވެސް، ޓެކްސް ނޫން އާމްދަނީގެ ގޮތުގައި ދައުލަތަށް ލިބުނު މިންވަރު ވަނީ ދަށްވެފައެވެ. އެގޮތުން މިދިޔަ މަހުގެ 24 ވަނަ ދުވަހާ ހަމައަށް ޓެކްސް ނޫން އާމްދަނީގެ ގޮތުގައި ލިބިފައިވަނީ 6.3 ބިލިޔަން ރުފިޔާއެވެ. ވޭތުވެދިޔަ އަހަރުގެ މި މުއްދަތުގައި މި އަދަދު 7.1 ބިލިޔަން ރުފިޔާގައި ހުރިއިރު، މިއީ 11.5 އިންސައްތައިގެ ދަށްވުމެކެވެ.
