މޮރޯކޯގެ އައު ބޮޑުވަޒީރު ފާތިމާ އައްޒަހްރާ އަލް މަންސޫރީ، އެ ޤައުމުގެ ފުރަތަމަ އަންހެން ބޮޑުވަޒީރުގެ މަޤާމާ ހަވާލުވެވަޑައިގަތުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކަމަނާއަށް ތަޙުނިޔާ ފޮނުއްވައިފިއެވެ.
މޮރޯކޯގެ 18 ވަނަ ބޮޑުވަޒީރުގެ ގޮތުގައި ފާތިމާ އައްޒަހްރާ އައްޔަނުކުރެއްވުމާ ގުޅިގެން ރައީސުލްޖުމްހޫރިއްޔާ ފޮނުއްވި މެސެޖުގައި، މިއީ މުޅި ދުނިޔެއަށާއި ޚާއްސަކޮށް އަރަބި ސަރަޙައްދަށް ލިބުނު ތާރީޚީ ކާމިޔާބީއެއްގެ ގޮތުގައި ސިފަކުރެއްވިއެވެ. އަދި މިއީ އަރަބި ޤައުމެއްގެ މިފަދަ އިސް މަޤާމަކަށް އަންހެން ބޭފުޅަކު އައްޔަނުކުރެވުނު ދެވަނަ ފަހަރުކަން ފާހަގަކުރައްވައި، ރައީސް މުޢިއްޒު ވިދާޅުވީ މިއީ ސަރަޙައްދުގެ ސިޔާސީ ތާރީޚުގައި ހުޅުވިގެންދިޔަ އައު ބާބެއް ކަމަށެވެ.
މީގެއިތުރުން، މިއީ ހިންގުމުގެ ދާއިރާގައި އަންހެނުންނަށް ލިބުނު ބޮޑު ކުރިއެރުމެއްގެ އިތުރުން، މުޅި އަންހެން މުޖުތަމަޢަށް ލިބިގެންދިޔަ ބޮޑު ހިތްވަރެއްކަމަށްވެސް ރައީސުލްޖުމްހޫރިއްޔާގެ މެސެޖުގައި ވިދާޅުވިއެވެ.
ދެޤައުމުގެ ގުޅުމާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ދިވެހިރާއްޖެއާއި މޮރޮކޯއާ ދެމެދު އޮތީ އިޙްތިރާމާއި އެއްބާރުލުން ދިނުމުގެ މައްޗަށް ބިނާވެފައިވާ ގާތް ގުޅުމެއް ކަމަށެވެ. އަދި އައު ބޮޑުވަޒީރުގެ ޒަޢާމަތުގައި މި ގުޅުން އިތުރަށް ބަދަހިވެގެންދާނެ ކަމަށް އުންމީދުކުރައްވާ ކަމަށްވެސް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ މޮރޯކޯގެ އައު ބޮޑުވަޒީރަށާއި އެ ޤައުމުގެ ރައްޔިތުންނަށް އުފާފާޤަތިކަމާއި، ތަނަވަސްކަމާއި ފުރިހަމަ ކާމިޔާބީއަށް އެދިވަޑައިގަންނަވަމުންނެވެ.
