ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫޢަކީ 2040 ވަނަ އަހަރު އަންނައިރު ތަރައްޤީވެފައިވާ ޤައުމަކަށް ރާއްޖެ ހެދުމަށް އެޅޭ އެންމެ ވަރުގަދަ އެއް ބިންގާ ކަމަށް އިޤްތިޞާދީ ތަރައްޤީއާއި، ދަތުރުފަތުރާއި، ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއެކު ތިލަފުއްޓަށް ވަޑައިގެން، އެރަށުގައި ކުރިއަށްދާ ބަނދަރުގެ މަސައްކަތްތައް ބައްލަވާލެއްވުމަށްފަހު ވަޒީރު ސަޢީދު ވިދާޅުވީ، މިއީ ރައީސް މުޢިއްޒު ހާއްސަ އިސްކަމެއް ދެއްވައިގެން ކުރިއަށްގެންދަވާ މަޝްރޫޢެއް ކަމަށެވެ. އަދި ވިޔަފާރި ބަނދަރު ތިލަފުއްޓަށް ބަދަލުނުކުރެވި އެތައް އަހަރެއް ފާއިތުވެގެން ދިޔުމަކީ ރާއްޖޭގެ ވިޔަފާރިއާއި އިޤްތިޞާދު އިތުރު ހަރުފަތަކަށް ގެންދިޔުމަށް އެޅިފައި އޮތް ބޮޑު ހުރަހެއްކަންވެސް ވަޒީރު ފާހަގަކުރެއްވިއެވެ.
މި ސަރުކާރުގެ އަމާޒަކީ އަންނަ އަހަރުގެ ނޮވެމްބަރު މަހުގެ ކުރިން މި މަޝްރޫޢުގެ ފުރަތަމަ ފިޔަވަހި ނިންމާ، 2028 ވަނަ އަހަރުގެ ނޮވެމްބަރުގެ ކުރިން މުޅި މަޝްރޫޢު އެއްކޮށް ނިންމާލުން ކަމަށް ވަޒީރު ވިދާޅުވިއެވެ.
މި މަޝްރޫޢު ނިމުމުން ލިބިގެންދާނެ ފައިދާތަކަށް އަލިއަޅުއްވާލައްވަމުން ވަޒީރު ވިދާޅުވީ، އިންޓަރނޭޝަނަލް ކީވޯލްއާއި ބަނދަރުގެ އިތުރުން ސްޓޯރޭޖް ވެއަރހައުސްތަކާއި، ފްރީޒޯންތައް ޤާއިމުކުރެވިގެންދާނެ ކަމަށެވެ. އަދި މާލޭގެ ބާޒާރުމަތީގައި ހުރި އަތޮޅު ފިހާރަތަކާއި ގޯޑައުންތައް ފަދަ ހުރިހާ އޮޕަރޭޝަންތަކެއް ތިލަފުއްޓަށް ބަދަލުވެ، ބްރިޖް މެދުވެރިކޮށް ކާގޯ އުފުލޭނެ އިންތިޒާމު ހަމަޖެހިގެންދާނެއެވެ. މީގެއިތުރުން، ހުޅުމާލެއިން އިންބައުންޑް ކާގޯގެ ޚިދުމަތާއި އެއާޕޯޓަށް ސީ-ޓު-އެއާ ކާގޯގެ ޚިދުމަތް ފޯރުކޮށްދިނުމަށް އެދެވޭ ހައްލެއް ލިބިގެންދާނެ ކަމަށްވެސް ވަޒީރު ވިދާޅުވިއެވެ.
