ހުޅުމާލޭ ދެވަނަ ފިޔަވަހީގައި ތަރައްޤީކޮށްފައިވާ 4،000 ހައުސިންގ ޔުނިޓުގެ ގަވާއިދާ ޚިލާފު މައްސަލަތަކާ ގުޅިގެން ފަހި ދިރިއުޅުން ކޯޕަރޭޝަން (އެފްޑީސީ) އިން ވަކިވަކިން ފިޔަވަޅުތައް އަޅަން ފަށައިފިއެވެ. މިދިޔަ މަހުގެ 21 ވަނަ ދުވަހާ ހަމައަށް އާންމުންގެ ފަރާތުން ހުށަހެޅުނު ޖުމްލަ 49 މައްސަލައެއް އެ ކުންފުނިން އަންނަނީ ބަލަމުންނެވެ.
އެފްޑީސީއަށް ހުށަހެޅުނު ޝަކުވާތަކުގެ ތެރޭގައި އެންމެ ގިނައީ ހުއްދަނެތި އެޕާޓްމަންޓްތަކަށް ބަދަލު ގެނައުމުގެ މައްސަލަތަކެވެ. މިގޮތުން ހުށަހެޅުނު 28 މައްސަލަގެ ތެރެއިން 5 މައްސަލައެއްގައި ހިމެނޭ ޔުނިޓުގެ ވެރިފަރާތްތައް މިހާރު ވަނީ ޖޫރިމަނާކޮށްފައެވެ. އަދި ބާކީ 23 މައްސަލައެއްގެ ތަޙުޤީޤު އަދިވެސް އަންނަނީ ކުރިއަށްދަމުންނެވެ.
ސަރުކާރުގެ ބޯހިޔާވަހިކަމުގެ ދަށުން ދޫކުރާ ފްލެޓްތައް އެހެން ފަރާތްތަކަށް ކުއްޔަށް ދިނުމަކީ މަނާކަމަކަށްވާއިރު، ގަވާއިދާ ޚިލާފަށް ކުއްޔަށް ދިން ކަމަށް ތުހުމަތުކުރެވޭ 16 މައްސަލައެއް ވެސް އެފްޑީސީން އަންނަނީ ބަލަމުންނެވެ. އޭގެ ތެރެއިން 5 ޔުނިޓެއްގެ ވެރިފަރާތް ޖޫރިމަނާކޮށް، 2 ޔުނިޓެއްގެ ވެރިފަރާތަށް ވަނީ ނޯޓިސް ފޮނުވާފައެވެ. މި ބާވަތުގެ އިތުރު 9 މައްސަލައެއް އަދިވެސް ދަނީ ތަޙުޤީޤު ކުރެވެމުންނެވެ.
މީގެއިތުރުން ގަވާއިދާ ޚިލާފަށް ކުނި އެޅުމާ ގުޅޭ 3 މައްސަލައެއް ބަލައި، އޭގެ ތެރެއިން 2 މައްސަލައެއްގައި ހިމެނޭ ފަރާތްތައް ވަނީ ޖޫރިމަނާކޮށްފައެވެ. އަދި އެންގުންތަކަށް ޢަމަލުނުކުރުމުގެ 2 މައްސަލައަކާއި، އަޑުގަދަވުމުގެ ޝަކުވާއާ ގުޅޭ 2 މައްސަލައެއް ވެސް އެ ކޯޕަރޭޝަނުން ވަނީ ބަލާފައެވެ.
ފްލެޓުތަކުގެ ކުލި ދެއްކުމުގެ ހާލަތަށް ބަލާއިރު، ޖުމްލަ 3,362 ޔުނިޓަކުން ގަވާއިދުން ކުލި ދައްކަމުން އަންނައިރު، ގަވާއިދުން ކުލި ނުދައްކާ 564 ޔުނިޓު ފާހަގަކުރެވިފައިވާ ކަމަށް އެފްޑީސީން ހާމަކުރެއެވެ.
އެފްޑީސީން ވަނީ ފްލެޓުތަކުގައި ދިރިއުޅޭ ހުރިހާ ފަރާތްތަކުން ވެސް ކަނޑައެޅިފައިވާ ގަވާއިދުތަކަށް ފުރިހަމައަށް ހުރުމަތްތެރިކޮށް ހިތުމަށް އިލްތިމާސްކޮށްފައެވެ. އަދި އުސޫލުތަކާ ޚިލާފުވާ ފަރާތްތަކާމެދު އިތުރަށް އަޅަންޖެހޭ ފިޔަވަޅުތައް އަޅަމުންދާނެ ކަމަށް އެ ކުންފުނިން ބުނެފައިވެއެވެ.
