އަރިއަތޮޅު އުތުރުބުރީ މަތިވެރީގައި ތަރައްޤީކުރަމުންދާ 500 މީހުންގެ ޖާގައިގެ ޒަމާނީ މިސްކިތުގެ މަސައްކަތް މިހާރު ބާރުދުވެލީގައި ކުރިއަށްދާ ކަމަށް އިސްލާމީ ކަންތައްތަކާ ބެހޭ ވުޒާރާއިން ހާމަކުރައްވައިފިއެވެ. މި މަޝްރޫޢު ނިމުމާއެކު، މަތިވެރީގައި ބޮޑު ޖަމާޢަތުގައި ނަމާދުކުރުމަށް ދިމާވެފައިވާ ޖާގައިގެ ދަތިކަމަށް ދާއިމީ ހައްލެއް ލިބިގެންދާނެ ކަމަށް އެ ވުޒާރާއިން ފާހަގަކުރެއެވެ.
ކޭއެންޑްއެފް ހޯލްޑިންގއާ ހަވާލުކޮށްގެން ކުރިއަށްގެންދާ މި މަޝްރޫޢުގެ މަސައްކަތް ނިމުނު އަހަރުގެ ސެޕްޓެމްބަރު މަހު ފެށި ނަމަވެސް، އެކި ސަބަބުތަކާ ހުރެ މަސައްކަތް މީގެ ކުރިން އޮތީ މަޑުޖެހިފައެވެ. އެހެންނަމަވެސް، މިހާރު މަސައްކަތް ހަލުވިކަމާއެކު ކުރިއަށްދާއިރު، ސަރުކާރުގެ އަމާޒަކީ އަންނަ އަހަރުގެ ތެރޭގައި މިސްކިތް މުޅިން ނިންމައި ރައްޔިތުންނަށް ބޭނުންކުރެވޭނެ އިންތިޒާމު ހަމަޖެއްސުމެވެ.
މަތިވެރީގައި ބިނާކުރާ މި މިސްކިތަކީ އެކުއެކީގައި ގިނަ ޚިދުމަތްތަކެއް ފޯރުކޮށްދޭނެ އިޖުތިމާއީ ބިނާއެކެވެ. މިގޮތުން، މި މިސްކިތް ފަރުމާކުރެވިފައިވަނީ އިއާދަކުރަނިވި ހަކަތަ ކަމަށްވާ އަވިން ހަކަތަ އުފައްދާ ނިޒާމު (ސޯލާ) މެދުވެރިކޮށް ކަރަންޓު ފޯރުކޮށްދެވޭ ތިމާވެއްޓާ ރައްޓެހި ގޮތަކަށެވެ. މީގެ އިތުރުން މުޅި މިސްކިތް އޭސީކުރެވިފައިވާއިރު، އަންހެނުންނަށް ނަމާދުކުރުމަށް ޚާއްޞަ ބައެއްވެސް މިސްކިތުގައި ހިމެނެއެވެ.
ހަމައެއާއެކު، މި ބިނާގައި ލައިބްރަރީއަކާއި ކުލާސްރޫމެއް ޤާއިމުކުރުމަށް ވަނީ ހަމަޖެހިފައެވެ. ސަރުކާރުން މިސްކިތުގައި ކްލާސްރޫމާއި ލައިބްރަރީ ހިމަނާފައިވަނީ ހަމައެކަނި އަޅުކަންކުރާ ތަނެއްގެ އިތުރުން، ޤުރުއާން ކްލާސްތައް ހިންގުމަށާއި، ދީނީ އިލްމު ފެތުރުމުގެ އިތުރުން ރަށުގެ އިޖުތިމާއީ ތަފާތު ހަރަކާތްތަކަށް މަގުފަހިކޮށްދިނުމުގެ މަގުސަދުގައެވެ.
