ރަސްމާލޭގައި ތަރައްޤީކުރުމަށް ހަމަޖެހިފައިވާ "މޯލްޑިވްސް ވޯޓަރ ފްރޮންޓް އެންޑް މެރީނާ" މަޝްރޫޢަކީ ދިވެހިރާއްޖޭގެ ރައްޔިތުންގެ މާލީ ތަނަވަސްކަމަށް އިންޤިލާބީ ބޮޑު ބަދަލެއް އަންނާނެ މަޝްރޫޢެއް ކަމަށް ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
މިއީ ބޭރުގެ ފަރާތަކުން ރާއްޖޭގައި ހިންގުމަށް މިހާތަނަށް ހުށަހަޅާފައިވާ އެންމެ ބޮޑު އިންވެސްޓްމަންޓް މަޝްރޫޢެވެ.
އަބޫދާބީގެ މަޝްހޫރު އީގަލް ހިލްސް ކުންފުނިން ރަސްމާލޭގެ އެއްފަޅީގައި ކުރިއަށްގެންދަން ރާވާފައިވާ މި މަޝްރޫޢުގެ ދަށުން، އެ ކުންފުނިން އެކަނިވެސް 20 ބިލިއަން ޑޮލަރު އިންވެސްޓްކުރުމަށް ވަނީ ނިންމާފައެވެ. ނަމަވެސް، މަޝްރޫޢާ ގުޅުންހުރި އެހެނިހެން ދާއިރާތަކާއެކު މުޅި ޖުމްލަ އިންވެސްޓްމަންޓްގެ އަދަދު މަދުވެގެން 31 ބިލިއަން ޑޮލަރަށް އަރާނެކަމަށް އެ ކުންފުނިން ލަފާކުރާކަން ވަޒީރު ފާހަގަކުރެއްވިއެވެ.
ދައުލަތުގެމީޑިއާއަށް މައުލޫމާތު ދެއްވަމުން ވަޒީރު މުއްޠަލިބު ވިދާޅުވީ، ރާއްޖޭގެ އިޤްތިޞާދު ސިންދަފާތުކޮށް (ވަކި ދާއިރާއަކަށް އެކަނި ބަރޯސާވުން ހުއްޓުވައި) ފުޅާކުރެވޭނީ ޤައުމުގައި ހުރި ވަސީލަތްތަކުގެ ބޭނުން އެންމެ ހެޔޮގޮތުގައި ހިފައިގެން ކަމަށެވެ. އެގޮތުން، ރާއްޖޭގައި މިހާރުވެސް އެންމެ ކުރިއަރާފައިވާ ފަތުރުވެރިކަމުގެ ސިނާޢަތާ ގުޅުވައިގެން މިފަދަ ބިޔަ މަޝްރޫޢެއް ހިންގުމުން، މުޅި އިޤްތިޞާދަށާއި ދިވެހިރާއްޖެއަށް އޭގެ ބޮޑު ފައިދާއެއް ކުރާނެއެވެ.
