ދިވެހިރާއްޖޭގެ އިޖުތިމާޢީ އަޚްލާގީ މިންގަނޑުތަކަށް ނުފެތޭ ގޮތަށް އަދި ނިވާކަން ކުޑަކޮށް ހެދުން އަޅައިގެން އާންމު ތަންތަނުގައި އުޅޭ ބިދޭސީންނާމެދު ޤާނޫނީ ފިޔަވަޅު އަޅާނެކަމުގެ އިންޒާރު ދިވެހި ފުލުހުންގެ ޚިދުމަތުން ދީފިއެވެ.
ފުލުހުން ނެރުނު ޚާއްޞަ ބަޔާނެއްގައި ބަޔާންކޮށްފައިވާ ގޮތުގައި، ރާއްޖޭގެ އިޖުތިމާޢީ މިންގަނޑުތަކާއި ސަގާފީ އާދަކާދަތަކަށް އިހުތިރާމްކުރުމަކީ ރާއްޖޭގައި ދިރިއުޅޭ ކޮންމެ މީހެއްގެވެސް ފަރުދީ މަސްއޫލިއްޔަތެކެވެ. ނަމަވެސް، ފަހަކަށް އައިސް ބައެއް ބިދޭސީން މަގުމައްޗާއި އާންމު އިޖުތިމާޢީ ސަރަހައްދުތަކުގައި ނިވާކަން ކުޑަކޮށް ހެދުން އަޅައިގެން އުޅޭކަން ފުލުހުންގެ ސަމާލުކަމަށް ވަނީ އައިސްފައެވެ.
މިފަދަ އަމަލުތަކުގެ ސަބަބުން މުޖުތަމަޢުގެ ސުލްހަމަސަލަސްކަމަށް އަސަރުކޮށް، ނުތަނަވަސްކަން އުފެދުމުގެ ކުރިން ފުލުހުންގެ ޤާނޫނީ ޒިންމާގެ ދަށުން އަޅަންޖެހޭ އެންމެހައި ފިޔަވަޅުތައް އަޅަމުން ގެންދާނެ ކަމަށްވެސް ފުލުހުން ވަނީ ވިދާޅުވެފައެވެ.
އެހެންކަމުން، އިޖުތިމާޢީ މިންގަނޑުތަކާ ޚިލާފަށް އުޅޭ ބިދޭސީން އެފަދަ އަމަލުތަކުން ދުރުހެލިވުމަށް ފުލުހުންގެ ޚިދުމަތުން ވަނީ އިލްތިމާސްކޮށް، ނަސޭހަތްތެރިވެފައެވެ.
