ދުނިޔޭގެ ހިތުގެ ދުވަހުގެ މުނާސަބަތާ ގުޅުވައިގެން، މުޅި ރާއްޖޭގައި ޚާއްސަ އިޖުތިމާއީ ހަރަކާތްތަކެއް މިއަދު ހަވީރު ކާމިޔާބުކަމާއެކު ކުރިއަށްގެންގޮސްފިއެވެ. މި ހަރަކާތްތަކަކީ ހިތުގެ ބަލިތަކުން ރައްކާތެރިވުމަށާއި، ދުޅަހެޔޮ ދިރިއުޅުމުގެ އާދަތަކަށް އާންމުން އަހުލުވެރިކޮށް ހޭލުންތެރިކަން އިތުރުކުރުމުގެ މަގުސަދުގައި ކުރިއަށްގެންދިޔަ ހަރަކާތްތަކެކެވެ.
މިއަދުގެ ހަރަކާތްތަކުގެ ތެރެއިން އެންމެ ޚާއްސަ އަދި ފާހަގަކޮށްލެވުނު މަންޒަރަކީ، މާލެއާއި އަތޮޅުތެރޭގެ އެކި ރަށްރަށުގައި ގިނަ އަދަދެއްގެ ބަޔަކު އެއްވެ، "ހިތުގެ ބައްޓަމަށް" އެތުރިލައިގެން ތިބެ ހިތުގެ ސިއްޙަތަށް ބާރުއެޅުމުގެ ގޮތުން ހޭދަކޮށްލި އުފާވެރި ވަގުތުކޮޅެވެ.
މާލެ ސަރަހައްދުގެ މައި ހަރަކާތް ބާއްވާފައިވަނީ ހުޅުމާލޭ ފޭސް 2 ގެ ރުއްގަނޑު-3 ސަރަހައްދުގައެވެ. މި ހަރަކާތް ޝަރަފުވެރިކޮށްދެއްވީ ސިއްޙަތާއި އާއިލާއާއި އިޖުތިމާޢީ ހުނަރުތައް ތަރައްޤީކުރުމާބެހޭ ވަޒީރު ޤީލާ އަލީއެވެ.
މި ހަރަކާތުގައި ސިއްޙީ ދާއިރާގެ ގިނަ މުއައްސަސާތަކަކުންނާއި ކަމާގުޅޭ ޖަމިއްޔާތަކުން ފުޅާދާއިރާއެއްގައި ބައިވެރިވެފައިވެއެވެ. އޭގެ ތެރޭގައި ސިއްޙަތާބެހޭ ވުޒާރާއާއި ދުނިޔޭގެ ސިއްޙަތު ޖަމިއްޔާ، ޓައިނީ ހާޓްސް އޮފް މޯލްޑިވްސް އަދި މޯލްޑިވިއަން ރެޑްކްރެސެންޓް ހިމެނެއެވެ. މީގެއިތުރުން ނޭޝަނަލް ސެންޓަރ ފޯރ ކާޑިއޯވަސްކިއުލާ ޑިޒީޒަސް، ނޭޝަނަލް ޑައިބެޓީސް ސެންޓަރު، ހުޅުމާލެ ހޮސްޕިޓަލް، އަރބަން ޕްރައިމަރީ ހެލްތު ކެއަރ ސެންޓަރ، މޯލްޑިވިއަން ފިޒިއޯތެރަޕީ އެސޯސިއޭޝަން، ހައުސިންގ ޑިވެލޮޕްމެންޓް ކޯޕަރޭޝަން އަދި އެމްއެންޔޫގެ ފެކަލްޓީ އޮފް ހެލްތު ސައިންސަސްއިން ވެސް މި ހަރަކާތުގައި ބައިވެރިވިއެވެ.
މި ހަރަކާތަކީ ހިތުގެ ބަލިތަކުން ދުރުހެލިވެ، ދުޅަހެޔޮ މުޖުތަމައެއް ބިނާކުރުމަށްޓަކައި ސިއްޙީ ދާއިރާގެ އިދާރާތަކާއި އެކި ޖަމިއްޔާތައް ގުޅިގެން ކުރިއަށްގެންދިޔަ މުހިންމު މަސައްކަތެކެވެ.
