\ޓެކްނޮލޮޖީއާއި އާޓިފިޝަލް އިންޓެލިޖެންސް (އޭއައި) ކިތަންމެ ވަރަކަށް ކުރިއަރައިގެން ދިޔަ ނަމަވެސް، ކޯޓުތަކަށް ހުށަހެޅޭ މައްސަލަތަކަށް ގޮތް ނިންމުމުގައި ފަނޑިޔާރުން ކުރައްވާ މުހިންމު މަސައްކަތްޕުޅާއި ފަނޑިޔާރުގެ ދައުރު އަލްގޯރިދަމްއަކަށް ދޫކޮށްލުމަކީ ކުރެވޭނެ ކަމެއް ނޫން ކަމަށް ދިވެހިރާއްޖޭގެ އުއްތަމަފަނޑިޔާރު ޢަބްދުލްޣަނީ މުޙައްމަދު ވިދާޅުވެއްޖެއެވެ.
އުއްތަމަފަނޑިޔާރު މިހެން ވިދާޅުވީ އުޒްބެކިސްތާންގެ ސަމަރުޤަންދުގައި އޮކްޓޯބަރު 1 އިން 2 އަށް ކުރިއަށްދިޔަ "އެސޯސިއޭޝަން އޮފް އޭޝިއަން ކޮންސްޓިޓިއުޝަނަލް ކޯޓްސް އެންޑް އިކުއިވަލަންޓް އިންސްޓިޓިއުޝަންސް" (އޭއޭސީސީ) ގެ 7 ވަނަ ކޮންގްރެސްގެ ދެވަނަ ދުވަހުގެ ޕްލެނަރީ ސެޝަންގައި ތަޤްރީރު ކުރައްވަމުންނެވެ.
މި ކޮންގްރެސްގައި އުއްތަމަފަނޑިޔާރު ތަޤްރީރު ކުރެއްވީ "ފްރޮމް ކޭސް ބެކްލޮގްސް ޓު ޓައިމްލީ ޖަސްޓިސް: ޑިޖިޓަލް ޓްރާންސްފޯމޭޝަން ފޮރ ސްޓްރެންތަނިންގ ޖުޑީޝަލް ޕާރފޯމަންސް އެންޑް ޕަބްލިކް ޓްރަސްޓް" (މައްސަލަތައް ލަސްނުވެ އަވަސް އިންސާފަށް: ޢަދުލު އިންސާފު ޤާއިމު ކުރުމުގެ ފެންވަރު ރަނގަޅުކޮށް އިތުބާރު އުފެއްދުމުގެ ޑިޖިޓަލް ޓެކްނޮލޮޖީގެ ދައުރު) މި މަޢުޟޫއަށެވެ.
އެމަނިކުފާނުގެ ތަޤްރީރުގައި، ކޯޓުތަކުގައި ނުނިމި ހުރި މައްސަލަތައް ނިންމުމަށް ރާއްޖޭގައި ކުރެވެމުންދާ ޚާއްޞަ މަސައްކަތްތަކަށް އަލިއަޅުވާލެއްވިއެވެ. އެގޮތުން ޓެކްނޮލޮޖީއާއި އޭއައިގެ އެހީގައި މައްސަލަތައް ލަސްވާ ސަބަބުތައް ދެނެގަތުމަށާއި، ޝަރީއަތުގެ މަސައްކަތްތައް އަވަސްކުރެވިދާނެ ގޮތްތަކާ މެދު ވާހަކަފުޅު ދެއްކެވިއެވެ.
އުއްތަމަފަނޑިޔާރު އެކަނި މޭރުމުން ވިދާޅުވީ، ޖުޑީޝަރީތަކުން އަމާޒު ހިފަންޖެހޭނީ އޭއައި ފަދަ ޒަމާނީ ޓެކްނޮލޮޖީތަކަކީ ފަނޑިޔާރުންގެ މަސައްކަތަށް އެހީތެރިވެދޭ ވަސީލަތްތަކެއްގެ ގޮތުގައި ބޭނުންކުރުމަށް ކަމަށެވެ. އަދި ރާއްޖޭގެ ޖުޑީޝަރީގައިވެސް މި އުޞޫލުން ބައެއް މަސައްކަތްތައް ކުރެވެމުންދާކަން ފާހަގަކުރައްވައި، ރާއްޖޭގައި ވަށާޖެހޭ ކޭސް މެނޭޖްމަންޓް ސިސްޓަމެއް ބޭނުންކުރުމާ މެދު ގެންގުޅުއްވާ ތަސައްވުރުވެސް ހިއްސާކުރެއްވިއެވެ.
އޭއޭސީސީގެ މެމްބަރު 18 ޤައުމެއްގެ އެންމެ މަތީ ކޯޓުތަކުގެ އިސްވެރިން ބައިވެރިވެވަޑައިގެންނެވި މި ކޮންގްރެސްގެ ހަވާސާގައި، އެހެން ޤައުމުތަކުގެ އުއްތަމަފަނޑިޔާރުންނާއި ޖުޑީޝަރީތަކުގެ އިސްވެރިންނާއެކު ބޭއްވުނު މުހިންމު މަޝްވަރާތަކުގައިވެސް ދިވެހިރާއްޖޭގެ އުއްތަމަފަނޑިޔާރު ބައިވެރިވެވަޑައިގަތެވެ.
މި ކޮންފަރެންސް ނިންމާލުމުގެ ގޮތުން، ދުސްތޫރީ ކޯޓުތަކުގައި އޭއައި ބޭނުންކުރުމާ ބެހޭގޮތުން ބައިވެރިން އެއްބަސްވި ހަމަތަކުގެ މައްޗަށް ބިނާކޮށް "ސަމަރުޤަންދު ޑިކްލަރޭޝަން" ގެ ނަމުގައި ޚާއްޞަ ޤަރާރެއް ވަނީ އެކުލަވާލައި ފާސްކޮށްފައެވެ.
