ޢާއިޝަތު ރަފާޙް ޢަލީ
އަހަރެމެންގެ މަންމާފުޅު ޢާއިޝާ ރަޟިޔަﷲ ޢަންހާއަށް ކުރެވުނު ތުހުމަތުގެ (ޙާދީޘަތުލް އިފްކު) ޙާދިޘާގައި، އެކަމަނާ ހިތްވަރު ހޯއްދެވީ ޔަޢްޤޫބް عَلَيْهِ السَّلَامُ ގެ ބަސްފުޅުންނެވެ:
ޔޫސުފް ސޫރަތުގެ 86 ވަނަ އާޔަތުގައި ﷲ ތައާލާ ވަޙީކުރައްވާފައިވެއެވެ.
إِنَّمَا أَشْكُو بَثِّي وَحُزْنِي إِلَى اللَّهِ
މާނައީ: ތިމަންކަލޭގެފާނުގެ މޮޅިޔާއި، ހިތާމައިގެ شكوى ދަންނަވާކަން ކަށަވަރީ، ހަމައެކަނި اللَّه އަށެވެ.
އަދި އެކަމަނާ ބޭނުންކުރެއްވީ حَسْبِيَ اللَّهُ وَنِعْمَ الْوَكِيلُ އެވެ. އެކަމަނާ ވަށައިގެން ބައްލަވާލެއްވިއިރު، އެހީތެރިވާނެ އެކަކުވެސް ނެތެވެ. "ޔާ ﷲ! ތިމަންކަމަނާއަށް އެހީތެރިވާނެ އެކަކުވެސް ނެތެވެ. ބައެއް ޞަޙާބީންވެސް އެ ދޮގު ވާހަކަތައް ފަތުރަނީއެވެ. ތިމަންކަމަނާގެ ފަޅީގައި ހުރި އެކަކުވެސް ނެތެވެ. حَسْبِيَ اللَّهُ وَنِعْمَ الْوَكِيلُ." އެ ނިކަމެތި ވަގުތުކޮޅުގައި އެކަމަނާ އިސްއުފުއްލަވައި ﷲ ސުބުޙާނަހޫ ވަތަޢާލާއަށް ދަންނަވައި ވިދާޅުވިއެވެ: "ތިމަންއަޅާއަށް ﷲ ފުދެއެވެ. އަދި އެކަލާނގެއީ އެންމެ ހެޔޮވެގެންވާ ރައްކާތެރިޔާއެވެ."
އެހެންކަމުން،ޛުލްޙިއްޖާ މަހުގެ ދުވަސްތަކާ އަހަރެމެން ކުރިމަތިލާއިރު، އަހަރެމެންގެ ބައްޕާފުޅު إِبْرَاهِيمُ عَلَيْهِ السَّلَامُ އާއި، އަހަރެމެންގެ ރަސޫލާ ﷺ ގެ ޙަޔާތްޕުޅާމެދު ވިސްނާލަމާ ހިންގަވާށެވެ. އަދި އެކި އާޔަތްތަކުން އިބްނުލް ޤައްޔިމް ރަޙިމަހުﷲ ވަރަށް ފުރިހަމައަށް ބަޔާންކޮށްދެއްވާފައިވާ މި ދުޢާގެ މުޢުޖިޒާތްތަކާއި ފައިދާތަކުގެ ތެރެއިން ބައެއް ކަންކަން ވެސް ތިޔަބޭފުޅުންނާ ޙިއްޞާކޮށްލާނަމެވެ.
إِبْرَاهِيمُ عَلَيْهِ السَّلَامُ އާމެދު ވިސްނާލައްވާށެވެ. އެކަކަށްވެސް ފެނިފައިނުވާފަދަ ބޮޑު އަލިފާންގަނޑެއްގެ ކުރިމަތީގައި إِبْرَاهِيمُ عَلَيْهِ السَّلَامُ ހުންނެވި ތަން ތަޞައްވުރުކޮށްލައްވާށެވެ. އެ އަލިފާންގަނޑުގެ ތެރެއަށް އުކާލެވުމުގެ ތައްޔާރީގައެވެ. ހެދުންކޮޅާއި، ޤަދަރާއި، އެހީތެރިންގެ ފަރާތުން މަހުރޫމްކުރެވިފައިވާ ޙާލުގައެވެ. ވަށައިގެން އެކަކުވެސް ނެތެވެ.
އެކަލޭގެފާނު ކޮންމެ ދިމާލަކަށް ބެއްލެވިޔަސް ފެނިވަޑައިގަންނަވަނީ ފުރައްސާރަކުރުމާއި، މަލާމާތްކުރުމާއި، އަލިފާނަށް އެކަލޭގެފާނު އެއްލާލުމަށް މީހުން ހިއްވަރުދޭ މަންޒަރެވެ. ސުބުޙާނަﷲ! އެކަލޭގެފާނުގެ އެހީތެރިއަކަށް އެކަކުވެސް ނެތެވެ. އެއީ ކިހާ ބޮޑު ހިތްދަތިކަމެއް ހެއްޔެވެ؟ އެއްވެފައިވާ މީހުންގެ ތެރެއިން "ކަންބޮޑުނުވާށޭ، ހުރިހާ ކަމެއްވެސް ރަނގަޅުވާނެއޭ" ބުނެލާނެ އެކަކުވެސް ނެތެވެ. އެއްވެފައިވާ މީހުންގެ ތެރޭގައި ސިއްރުންވެސް ތާއީދުކުރާނެ އެކަކުވެސް ނެތެވެ. އެންމެންވެސް މަލާމާތްކޮށް، އެކަލޭގެފާނު އަލިފާނަށް އެއްލާލުމަށް ތައްޔާރުވެގެން ތިއްބެވެ.
