2018 އިން 2023 އަށް އެމްޑީޕީން ވެރިކަންކުރީ މަޖިލީހުގެ ފުރިހަމަ އަޣްލަބިއްޔަތު އޮވެގެންނެވެ. އެއިރުވެސް ވެރިކަންކުރީ ހަމަ މިހާރުވެސް ވެރިކަން މިކުރާ ނިޒާމަށެވެ. ކައުންސިލްތަކުގެ ބޭރުގައެވެ. ކައުްނސިލްތަކުން ކަންކަން ނިންމައިގެންނެވެ. އެމްޑީޕީ އެންމެ ފަހުން ވެރިކަންކުރި 5 އަހަރު ނިމިގެންދިއައިރު އެންމެ ކައުންސިލަކަށް އެންމެ އިންވެސްޓްމަންޓެއްވެސް ހޯދައިދެވުނުބާވައެވެ؟ އެންމެ އަތޮޅު ކައުންސިލަކަށްވެސް އަދި އެންމެ ސިޓީ ކައުންސިލަކަށްވެސް ހޯދައިދެވުނުބާވައެވެ؟ އެމްޑީޕީގެ ވެރިކަމަކުން ރައްޔިތުންނަށް ކުރާނެ އެއްވެސް ފައިދާއެއް ނެތްކަން ރައްޔިތުންނަށް ވިސްނި ވެރިކަމުން ބޭލީމާ މިހާރު ދައްކަނީ އިންވެސްޓްމަންޓްތައް ހޯދައިދޭ ވާހަކަތަކެވެ. އެވާހަކަތައް ޤަބޫލުނުކުރާނެ ތަނުގައި އެބާވަތުގެ ވާހަކަތައް އަޑުއަހާނީވެސް ބުއްދި ސަލާމަތުން ނެތް ބައެކެވެ. ބުއްދި ސަލާމަތުން ހުރި މީހަކު އަޑުއަހައިފިނަމަ ކުރާނީ ކުރިން މިކުރި ފަދަ ސުވާލެކެވެ. ވެރިކަމުގައި ތިބޭއިރު ރައްޔިތުންނަށް ފައިދާކުރާނެ ގޮތް ނުވިސްނުނީ ކީއްވެގެންތޯއެވެ؟ ރައްޔިތުންގެ ދިރިއުޅުމުގެ ކަންކަން ކުރިއަރައިގެން ނުދާ ސަބަބަކީ މިފަދަ ދެކޮޅު ނުޖެހޭ ވާހަކަތައް ޤަބޫލުކޮށް ހެއްލެވޭ ކަމެވެ. ދައްކާ ހުވަފެންތައް އެއީ ޙަޤީޤަތް ކަމަށް ޤަބޫލުކުރެވޭ ކަމެވެ.
ކައުންސިލްތަކަށް ކޮށްދޭންޖެހޭ ކަންކަން ވެރިކަމުގައި ތިބިއިރު ނޭނގުނު ބައަކު ވެރިކަމުން ބޭލީމާ ގޮވާ ކޮހުން ބޯހަލާކު!
