ދުނިޔޭގެ އެންމެ މަގުބޫލު ފަތުރުވެރި މަންޒިލްގެ ގޮތުގައި ދިވެހިރާއްޖެ ސާބިތުކަމާއެކު ދެމިއޮތުމުގެ އަސްލަކީ، މި ސިނާއަތުގައި ދުވާލާއި ރޭގަނޑު ހީވާގިކަމާއެކު މަސައްކަތްކުރަމުންދާ ކޮންމެ ފަރުދެއްގެ ބުރަ މަސައްކަތާއި ކެރުންކަމަށް ވަޒީރު މުޙައްމަދު އަމީން ވިދާޅުވެއްޖެއެވެ.
މިއަދު ފާހަގަކުރަމުންދާ ޤައުމީ ފަތުރުވެރިކަމުގެ ދުވަހުގެ މުނާސަބަތުގައި، ފަތުރުވެރިކަމުގެ ދާއިރާގެ އެންމެހައި ބައިވެރިންނަށާއި، ރިސޯޓުތަކާއި ކަންކޮޅުތަކުގައި މަސައްކަތްކުރާ މުވައްޒަފުންނަށް ތަހުނިޔާއާއި ހެޔޮއެދުންތައް ފޮނުއްވަމުން ވަޒީރު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ ނަން ދުނިޔޭގެ ކުރިބޯށީގައި ރަންއަކުރުން ފެވިގެންދިޔައީ ސިނާއަތުގެ މަސައްކަތްތެރިންގެ މިންނަތް މަސައްކަތުން ކަމަށެވެ.
ދިވެހިރާއްޖޭގެ އިޤްތިޞާދީ މައިބަދައަކީ ފަތުރުވެރިކަންކަން ފާހަގަކުރައްވަމުން ވަޒީރު ވިދާޅުވީ، މިއީ މުޅި ދުނިޔެއަށް ރާއްޖެ ގުޅުވައިދީ، ހزارުކުރަނިވި ގިނަ ފުރުޞަތުތަކެއް ދިވެހި ރައްޔިތުންނަށް ފަހިކޮށްދޭ ދާއިރާއެއް ކަމަށެވެ. އަދި ދިވެހިންގެ ހައިސިއްޔަތުން މިއަދު ރާއްޖޭގެ ފަތުރުވެރިކަމުގެ ސިނާއަތާމެދު ކޮންމެ ދިވެހިރައްޔިތަކުވެސް އިންތިހާއަށް ފަޚުރުވެރިވާކަމަށް އެކަލޭގެފާނު ފާހަގަކުރެއްވިއެވެ.
މީގެއިތުރުން، ފަތުރުވެރިކަމުގެ ދާއިރާ އާ އުސްމިންތަކަކަށް ގެންދިއުމަށާއި، ދެމެހެއްޓެނިވި ގޮތެއްގައި މި ސިނާއަތް ކުރިއެރުވުމަށްޓަކައި ދޭންޖެހޭ ފުރިހަމަ އެއްބާރުލުމާއި އެހީތެރިކަން ދިނުމުގައި ސަރުކާރު ސާބިތުކަމާއެކު ދެމިއޮންނާނެކަމުގެ ފުރިހަމަ ޔަޤީންކަންވެސް ވަޒީރު އަމީން ވަނީ ދެއްވާފައެވެ.
ރާއްޖޭގައި ފުރަތަމަ ފަހަރަށް ރިސޯޓެއް ހުޅުވައި، ފަތުރުވެރިކަން ފެށުނު އޮކްޓޫބަރު މަހުގެ 3 ވަނަ ދުވަސް، "ޤައުމީ ފަތުރުވެރިކަމުގެ ދުވަހުގެ" ގޮތުގައި ފާހަގަކުރަން ސަރުކާރުން ނިންމަވާފައިވަނީ 2021 ވަނަ އަހަރުގެ ތެރޭގައެވެ.
