މަގުމަތީގެ ރައްކާތެރިކަން ކަށަވަރުކުރުމަށާއި، ނުރައްކާތެރިކޮށް އުޅަނދު ދުއްވާ ފަރާތްތަކުގެ އަމަލުތައް ހުއްޓުވުމަށް ދިވެހި ފުލުހުންގެ ޚިދުމަތުން ހާއްސަ ހަރުކަށި ފިޔަވަޅުތަކެއް އަޅަން ފަށައިފިއެވެ. ފުލުހުން ނެރުނު ނޫސްބަޔާނެއްގައި ހާމަކޮށްފައިވާ ގޮތުގައި، އާންމުންގެ ހިތްތަކުގައި ބިރުވެރިކަން އުފެދޭ ގޮތަށް އުޅަނދު ދުއްވާ ފަރާތްތަކާ މެދު ހަރުކަށި ފިޔަވަޅުތައް އަޅަމުންދާނެ ކަމަށާއި، މިފަދަ އަމަލުތައް ތަކުރާރުކުރާ މީހުންގެ ވަނަވަރު އާންމުކުރަން ވަނީ ނިންމާފައެވެ.
ފުލުހުން ފާހަގަކޮށްފައިވާ ގޮތުގައި، މަގުމަތީގައި ޒިގްޒެގްކޮށް ބިރުވެރިކަން އުފެދޭ ގޮތަށް ދުއްވުމާއި، އުޅަނދުތަކުގެ ސައިލެންސަރު ބަދަލުކޮށްގެން އަޑުގަދަކޮށް ދުއްވުމުގެ އިތުރުން ހަރު ބިންމަތީގައި ގާނަމުން ދުއްވާ ފަރާތްތަކަށް ހާއްސަ ސަމާލުކަމެއް ދެވޭނެއެވެ. މީގެއިތުރުން ދުވެލި މަޑުކުރަންޖެހޭ ސަރަހައްދުތަކުގައި ބާރު ސްޕީޑުގައި ދުއްވުމާއި، ހުއްދައާ ނުލައި ރޭސްޖެހުމާއި، ހުނަރު ދެއްކުމާއި، ނުރައްކާތެރިކޮށް އޯވަޓޭކް ކުރުމުގެ އިތުރުން މަސްތުގެ ހާލަތުގައި ދުއްވުމާއި ފުލުހުން މަޑުކުރަން އެންގުމުން ނު މަޑުކޮށް ފިލަން މަސައްކަތްކުރާ ފަރާތްތަކާމެދުވެސް ފިޔަވަޅު އަޅާނެއެވެ.
ނުރައްކާތެރިކޮށް އުޅަނދު ދުއްވާ މީހުންގެ އިތުރުން، އެ އުޅަނދެއްގެ ވެރިފަރާތަށްވެސް ފިޔަވަޅު އެޅުމަށް ވަނީ ހަމަޖެހިފައެވެ. އެގޮތުން ގަވާއިދާ ހިލާފުވާ އުޅަނދުތައް 30 ދުވަހަށް ފުލުހުންގެ ބެލުމުގެ ދަށަށް ގެންދެވޭނެ ކަމަށާއި، ކަނޑައެޅިފައިވާ މުއްދަތުގައި ވެރިފަރާތުން ހަވާލުނުވާ އުޅަނދުތައް އުސޫލުގެ ދަށުން ނައްތާލެވޭނެ ކަމަށް ފުލުހުން ބުނެފައިވެއެވެ. އަދި މިފަދަ އަމަލުތަކުގައި ސަރުކާރުގެ މުއައްސަސާތަކާއި ކުންފުނިތަކުގެ މުވައްޒަފުން ޝާމިލުވާނަމަ، އެ ފަރާތްތަކާ މެދު އިދާރީ ފިޔަވަޅު އެޅުމަށްޓަކައި އެ މުއައްސަސާތަކަށް މައުލޫމާތު ހިއްސާކުރަމުންދާނެއެވެ.
ފުލުހުންގެ ޚިދުމަތުން މިހާރު ދަނީ ނުރައްކާތެރިކޮށް ދުއްވާ މީހުން ދެނެގަނެ އެމީހުންގެ މައުލޫމާތު ޕްރޮފައިލް ކުރުމުގެ މަސައްކަތް ކުރަމުންނެވެ. ނަސޭހަތް ދިނުމަށްފަހުވެސް މިފަދަ އަމަލުތައް ތަކުރާރުކުރާނަމަ، ޖޫރިމަނާ ކުރުމުގެ އިތުރުން އިތުރު އިންޒާރަކާ ނުލައި ތަހުގީގު ހިންގާނެ ކަމަށް ފުލުހުން ވަނީ ހާމަކޮށްފައެވެ. މީގެއިތުރުން، މިފަދަ މައްސަލަތަކުގައި އާންމުން ހިއްސާކުރާ ފޮޓޯއާއި ވީޑިއޯތަކުގެ ސައްހަކަން ކަށަވަރުކުރުމަށްފަހު ގާނޫނީ ފިޔަވަޅު އަޅަމުންދާނެ ކަމަށްވެސް ފުލުހުން ބުނެފައިވެއެވެ.
އެސިސްޓެންޓް ކޮމިޝަނަރ އޮފް ޕޮލިސް އަދި ހެޑް އޮފް ހުޅުމާލެ ޕޮލިސް އާސިމް ޢަބްދުﷲ ވިދާޅުވެފައިވަނީ ކުރިއަށްއޮތްތަނުގައި ޑިޖިޓަލް ފައިން ތައާރަފްކުރުމަށް ނިންމާފައިވާކަމަށާއި އޭރުން އުޅަނދުތައް ޓޯވ ކުރަން ނުޖެހި ފައިން ކުރެވޭނެކަމަށެވެ.
