ށ. މަރޮށީގެ ޞިއްޙީ މަރުކަޒުގައި ލެބޯޓަރީގެ ޚިދުމަތް ރަސްމީކޮށް ފަށައި، އެ މަރުކަޒުން ދެމުންއައި ޚިދުމަތްތައް 24 ގަޑިއިރަށް ބަދަލުކޮށްފިއެވެ.
މިއަދު މަރޮށީގައި ބޭއްވި ޚާއްޞަ ރަސްމިއްޔާތެއްގައި މި ޚިދުމަތްތައް ފައްޓަވައިދެއްވީ ޞިއްޙަތާއި ޢާއިލާއާއި އިޖްތިމާޢީ އެހީއާ ބެހޭ ވަޒީރު ޤީލާ ޢަލީއެވެ. މި ރަސްމިއްޔާތުގައި ސިއްޙީ ވުޒާރާއާއި، މަރޮށީ ކައުންސިލްގެ އިތުރުން އެރަށު ޞިއްޙީ މަރުކަޒުގެ އިސްވެރިން ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ވާހަކަދައްކަވަމުން ވަޒީރު ޤީލާ ޢަލީ ވިދާޅުވީ، އައު ލެބޯޓަރީއާއެކު ޞިއްޙީ މަރުކަޒުގެ ޚިދުމަތް 24 ގަޑިއިރަށް ފުޅާވެގެން ދިއުމަކީ މަރޮށީގެ ރައްޔިތުންނަށް ލިބުނު ބޮޑު ކުރިއެރުމެއް ކަމަށެވެ. އަދި ލެބޯޓަރީގެ ޚިދުމަތް އެރަށުން ލިބެން ފެށުމާއެކު، އާދައިގެ ޓެސްޓުތައް ހެދުމަށްޓަކައި އެހެން ރަށްރަށަށް ދަތުރުކުރަން ޖެހުނު ދަތިކަމަށް ނިމުމެއް އަންނާނެކަން ވަޒީރު ފާހަގަކުރެއްވިއެވެ.
މީގެ ކުރިން މަރޮށީ ޞިއްޙީ މަރުކަޒުން ޚިދުމަތް ދެމުންއައީ ދުވާލަކު 16 ގަޑިއިރުއެވެ. ނަމަވެސް އައު ލެބޯޓަރީއާއެކު، އެރަށުގެ ޞިއްޙީ ނިޒާމަށް މިވަނީ ބޮޑު އިގިލާބީ ބަދަލެއް އައިސްފައެވެ.
