ޅ. ނައިފަރުގައި ކުރިއަށްދިޔަ "ނައިބޮލި ބިޒްނަސް އެކްސްޕޯ 2026" ގައި މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ބައިވެރިވެއްޖެއެވެ.
ފާދިއްޕޮޅު ނައިފަރު ކައުންސިލުން އިންތިޒާމުކޮށްގެން އޮކްޓޯބަރު މަހުގެ 2 އިން 3 އަށް ކުރިއަށްގެންދިޔަ މި އެކްސްޕޯއަކީ އެ ރަށުގެ ވިޔަފާރިވެރިންނާއި، ކުދި ވިޔަފާރިތަކުގެ އިތުރުން އުފެއްދުންތެރި ފަރާތްތަކަށް އެފަރާތްތަކުގެ އުފެއްދުންތަކާއި ޚިދުމަތްތައް ޕްރޮމޯޓްކޮށް، މާކެޓްކޮށް ވިއްކުމުގެ ފުރުޞަތު ހޯދައިދިނުމަށް ކުރިއަށްގެންދިޔަ މުހިންމު ޕްލެޓްފޯމެކެވެ. "އެކްސްޕްލޯރ. ކަނެކްޓް. ގްރޯ" މި ޝިއާރުގެ ދަށުން ކުރިއަށްދިޔަ މި އެކްސްޕޯގައި މިނިސްޓްރީން ބައިވެރިވީ އާންމުންނާ ގުޅުން ބަދަހިކޮށް، ދަނޑުވެރިކަމާއި މަސްވެރިކަމުގެ ސިނާއަތް ކުރިއެރުވުމަށް ކުރަމުންދާ މަސައްކަތްތައް ދައްކާލުމަށެވެ.
މި އެކްސްޕޯގައި މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާގެ ސްޓޯލަށް ޒިޔާރަތްކުރި ފަރާތްތަކަށް މުހިންމު ދާއިރާތަކަކުން މައުލޫމާތު ވަނީ ފޯރުކޮށްދީފައެވެ. އޭގެ ތެރޭގައި ހިމެނެނީ:
- ދަނޑުވެރި ނަފާ ލޯނާ ގުޅޭ މައުލޫމާތު
- އާރް.އެސް.ޑަބްލިއު (RSW) ޕްރޮޖެކްޓާ ބެހޭ މައުލޫމާތު
- ގަހާއި ޖަނަވާރު އެތެރެކުރުމުގެ އުސޫލުތަކާއި ހުއްދަތަކާ ގުޅޭ މައުލޫމާތު
- ފިޝަރީޒް މާކެޓިންގ ކޯޕަރޭޝަންގެ މަސައްކަތްތައް
މި މުހިންމު ސިނާއަތްތަކުގައި ކުރިއަށްދިއުމަށާއި ވިޔަފާރި ފުޅާކުރުމަށް މިނިސްޓްރީގެ ޚިދުމަތްތަކުން އެހީތެރިވެދެވޭނެ ގޮތްތައް އޮޅުންފިލުވުމަށް ސްޓޯލަށް ޒިޔާރަތްކުރި އެންމެހާ ފަރާތްތަކާއި ވިޔަފާރިވެރިންނާ ބައްދަލުވެ މަޢުލޫމާތު ހިއްސާކުރުމަކީ ވުޒާރާއަށް ލިބުނު ވަރަށް ބޮޑު އުފަލެއް ކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ފާހަގަކުރެއެވެ.
