ހުޅުމާލޭގެ ރިއަލް އެސްޓޭޓް ބާޒާރު އިތުރަށް ފުޅާވެ، އެކި މަރުހަލާތަކުގައި 3،100 އަށްވުރެ ގިނަ ސެމީ-ލަގްޒަރީ އަދި ލަގްޒަރީ އެޕާޓްމަންޓު ތަރައްޤީކުރުމުގެ މަސައްކަތް ބާރަށް ކުރިއަށްދާކަން ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ހާމަކުރައްވައިފިއެވެ.
"އަހާށޭ ބުނާނަން" ޕްރޮގްރާމުގައި ވާހަކަދައްކަވަމުން އެޗްޑީސީގެ މެނޭޖިންގ ޑިރެކްޓަރ ޢަލީ ޒުހައިރު ވިދާޅުވީ، ހުޅުމާލެ ފޭސް 1 އަދި ފޭސް 2 ގައި ތަފާތު 172 ޑިވެލޮޕްމެންޓެއްގެ ދަށުން މިހާތަނަށް 12،831 ސެމީ އަދި ލަގްޒަރީ އެޕާޓްމަންޓު ނިންމައި ބާޒާރަށް ނެރެވިފައިވާ ކަމަށެވެ.
މީގެ އިތުރުން، މިވަގުތުވެސް އަމަލީ މަސައްކަތް ހިނގަމުންދާ އިތުރު މަޝްރޫޢުތަކުގެ ތަފްސީލު ދެއްވަމުން ޒުހައިރު ވިދާޅުވީ، އެކި މަރުހަލާތަކުގައި މިހާރު ކުރިއަށްދަނީ ސެމީ-ލަގްޒަރީ ފެންވަރުގެ 1،763 ޔުނިޓާއި، ލަގްޒަރީ ފެންވަރުގެ 1،400 ޔުނިޓުގެ މަސައްކަތް ކަމަށެވެ. އެއާއެކު ޖުމްލަ 3،163 އެޕާޓްމަންޓުގެ މަސައްކަތް މިވަގުތުވެސް ހުޅުމާލޭގައި އެކި ފަރާތްތަކުން ތަރައްޤީކުރަމުން އެބަދެއެވެ.
މި މަޝްރޫޢުތަކާއެކު ހުޅުމާލޭގެ ބޯހިޔާވަހިކަމުގެ ބާޒާރަށް ބޮޑު އިތުރުވުމެއް އަންނާނެކަމަށް އެޗްޑީސީން ފާހަގަކުރެއެވެ.
