ފަށާނީ މިޘާލަކުންނެވެ. ވެރިންނަށް ކިޔަމަންގަތުން ދީނުގައި އެބައޮތެވެ. ނަމަވެސް އެންމެ ބޮޑެތި ބައެއް ޢިލްމްވެރިންވަނީ ވެރިން ކުރާ އަމުރަށް ދެކޮޅުހައްދަވައިފައެވެ. އެކަމުގެ ސަބަބުން ހުރަގޭގައި ދުވަސްތައް ހޭދަކުރައްވަން ޖެހިވަޑައިގެންނެވި ޢިލްމްވެރިނާއި ބޮޑެތި އަނިޔާތައް ލިބިވަޑައިގެންނެވި ބޭކަލުންތައްވެސް އެބަ ތިއްބެވިއެވެ.
އެބޭކަލުންނަށް ވެރިން ކުރި އަމުރަށް ކިޔަމަންތެރިވެނުލެއްވީ އެޢަމުރަކީ ﷲ ތަޢާލާގެ އެންގެވުންތަކާއި ޚިލާފް ކަންކަމަށްވާތީއެވެ. އެފަދަ އަމުރަކަށް ކިޔަމަންތެރިވެލައްވައިފިނަމަ ﷲ ތަޢާލާ ދެއްވަވާނެ ޢަޛާބަށް ބިރުފުޅުންނެވެ.
މިހިސާބުން މައުޟޫއާއިގެން ކުރިއަށްދަމާ ހިނގާށެވެ!
ދެންމި ބުނެދެނީ މައުޟޫއާއި ގުޅުންހުރި މިޘާލެކެވެ. ތަނަވަސް މީހަކު ތިބާގެ ކައިވެންޏަށް އެދިގެން އައުމުން އޭނާއާއިއެކު ތަންތަނަށްދާން ނުވަތަ އެކަހެރިވާން މައިންބަފައިން ބުނިނަމަވެސް އެފަދަ ކަމަކަށް ޢިޖާބަދީގެން ނުވާނެއެވެ. ނަމާދުނުކުރާ، ތަޤްވާވެރިކަމެއް ނެތް މީހަކާ ކައިވެނިކުރަން ބުނިނަމަވެސް އެކަމަށް ރުހިގެން ނުވާނެއެވެ. ސަބަބަކީ އެކަންކަން ނުކުރަން ﷲ ތަޢާލާ އަންގަވާފައިވާތީއެވެ.
ބައެއް ކުދިންނަށް ވިސްނިފައި އޮންނަނީ މައިންބަފައިން ކުރަން ބުނާހައި ކަމެއް ކުރަންޖެހޭނެ ކަމަށެވެ. ކޮންމެ ކަމެއް ކުރަން ބުނިނަމަވެސް ކުރަންޖެހޭނެ ކަމަށެވެ. ނަމަވެސް އެއީ އެކަން އޮތްގޮތެއް ނޫނެވެ.
އަހުރެމެންނަކީ މުސްލިމުންނެވެ. ކޮންމެ ކަމެއްގައިވެސް ބޯލަނބަން އޮތީ ﷲ ތަޢާލާއަށެވެ. ކިޔަމަންތެރިކަން އަދާކުރަންޖެހޭނީވެސް ﷲ ތަޢާލާއަށެވެ. މައިންބަފައިންގެ އަމުރުތައްވެސް އަންނާނީ އެއިގެ ފަހަތުންނެވެ.
މިވާހަކަ މިގޮތަށް ދައްކަން މިޖެހެނީ ﷲ ތަޢާލާގެ އެންގެވުންތަކާއި ޚިލާފްވާގޮތަށް ކަންކަން ކުރަން ބައެއް ބަފައިން ބުނާތީ ދަރިން ކުރާ ސުވާލުތަކަށް ޖަވާބުދިނުމަށެވެ.
ލޮބުވެތި ދަރިންނޭވެ! ކީރިތި ޤުރްއާނުގައި އޮތީ މައިންބަފައިން ނަމަވެސް ﷲ ތަޢާލާ ނަހީ ކުރެއްވެވި ކަމެއް ކުރުމަށް އަމުރުކޮށްފިނަމަ ކިޔަމަންތެރި ނުވުމަށެވެ. އެމީހުން ކުރާ ކޮންމެ އަމަރުކަށް ކިޔަމަންވުމަކަށް ޤުރްއާނަކު ނެތެވެ.
އޮތީ އެމީހުންނަށް އިޙްޞާންތެރިވުމަށެވެ. ހެޔޮކޮށް ހިތުމަށެވެ. ވީމާ ﷲ ތަޢާލާއަށް އުރެއްދުމެއް އޮތް ކަމަކަށް މައިންބަފައިން އަމުރުކުރި ނަމަވެސް ކިޔަމަންނުވާށެވެ!
ހުރިހާ އާޔަތެއްގައިވެސް ﷲ ތަޢާލާ އަންގަވާފައި އޮތީ ﷲ ތަޢާލާއަށް ކިޔަމަންތެރިވުމަށެވެ. ވީމާ ކޮންމެ ކަމެއްގައިވެސް ކިޔަމަންތެރިކަން އަދާކުރަން ޖެހޭނީ ހަމައެކަނި ﷲ ތަޢާލާއަށެވެ! މައިންބަފައިންނަށް ވެސް ކިޔަމަންތެރިވުން އޮތީ ﷲ ތަޢާލާ އަންގަވާފައިވާ ކަންކަމުގައި ކުރާ އަމުރުތަކަށެވެ. އިސްލާމް ދީނުގައި އޮތް ގޮތަށް ކަންކަން ކުރަން ކުރާ އަމުރުތަކަށެވެ!
އެއްވެސް ޙާލެއްގައި މިބުނީ މައިންބަފައިން ކުރާހައި އަމުރަކަށް ނުކިޔަމަންތެރިވުމަކަށް ނޫނެވެ. ހަމައެކަނި ﷲ ތަޢާލާ ނަހީ ކުރެއްވެވި ކަމެއް ކުރަން އަމުރުކޮށްފިނަމަ ކިޔަމަންތެރި ނުވުމަށެވެ. ވީމާ މާނަ އޮޅުވައިނުލާށެވެ!
--މުފްތީ މެންކުގެ ދަރުސަކުން
