ޖީބުގައި ފައިސާ އިތުރުވުމަށް އެދޭނަމަ ފުރަތަމަ ކަމަކަށްވެސް ފަތިސްނަމާދުން ދުވަސްފަށަންޖެހޭ ކަމަށް ޢިލްމްވެރިން ވިދާޅުވާ ބަސްފުޅަށް ދުނިޔޭގެ ތަނަވަސް މީހުން މިހާރު ތާއީދުކުރޭ!

ފާއިތުވި ހަފްތާއެއްހައި ދުވަހަށް ބަލައިފިނަމަ ވަރަށް އުފާވި 2 ފަތިސްނަމާދު މާލޭ ސަހަރާ މިސްކިތުގައި ކުރެވުނެވެ. އެއްނަމާދުގައި މިސްކިތުގެ ދެބައިވެސް ފުރި ބޭރުގައިވެސް ނަމާދުކުރިއެވެ. ދެވަނަ ނަމާދުގައިވެސް މިސްކިތުގެ ދެބައިވެސް ފުރުނެވެ.  

މިޢަދަދަށް ސަޙަރާ މިސްކިތުގައި ނަމާދުކުރެވުނުއިރު އެެހން މިސްކިތްތަކުގެ ޖަމާޢަތުން ބައަކު މަދުވިކަން ފާހަގަނުކުރެވޭ ކަމަށް އެހެން މިސްކިތްތަކުގައި ނަމާދުކުރި މީހުން ބުނެއެވެ. އެކަމުން އެނގެނީ އިތުރު ބައަކު އެ ދެރޭ ފަތިސްނަމާދުކުރިކަމެވެ.  

އެއީ ޖަނާޒާ އޮތުމުންނެވެ. މިއީ ވަރަށް ބޮޑު އުފަލެއް ލިބުނު ކަމެކެވެ. ނަމަވެސް ވިސްނާލަންވީ ފަތިސްނަމާދުކުރުން ވާޖިބުވަނީ ހަމައެކަނި ގާތް މީހެއްގެ ޖަނާޒާ އޮތުމުން ނޫންކަމެވެ. އެއީ ކޮންމެ މުސްލިމަކުވެސް ކޮންމެ ދުވަހަކުވެސް ކުރުން ވާޖިބުކަމެއް ކަމެވެ.  

ދަރުސް:  

އެންމެ ފުރަތަމަ މިބުނެލަނީ އަހުރެންނާއި ބައްދަލުވި މުސްލިމް ނޫން ހުރިހާ މިލިއަނަރުންވެސް އެއްބަސްވާ ބައެއް ކަންކަމެވެ. "ލަސްވެގެން ފަތިހު 5 ޖަހާއިރު ހޭލަންވާނެއެވެ. ނިދިފިލުވައިލަންވާނެއެވެ. ކަލާނގެ ކުޅަދުންވަންތަކަމާއި ހުރިހާ ބާރުތަކެއް ލިބިގެންވަނީ ކަލާނގެއަށްކަން ވިސްނައިލުމަށް ހިނދުކޮޅެއް ހޭދަކުރަންވާނެއެވެ. ހުޅުވިފައިވާ ސިކުނޑިއަކުން ތިމާ އެދުވަހު ކުރަންޖެހޭ ކަންކަމަށް ވިސްނަންވާނެއެވެ. އެއިގެ ތެރެއިން އެންމެ މުހިންމު 3 ކަންތައް ފާހަގަކޮށް އެ 3 ކަންތައް އެދުވަހުކުރަން މަސައްކަތްކުރަންވާނެއެވެ."  

މިމޭރުމުން ބުނެފައިވަނީ މުސްލިމުންނެއް ނޫނެވެ. އެހެން ދީންތަކުގެ މީހުންނެވެ. ވީމާ އެމީހުން ފަތިހު ހޭލައި ފުރަތަމަ ކަމަކަށް ފަތިސްނަމާދުކޮށް ޛިކުރުކުރުމުގެ ވާހަކައެއް ނުދައްކާނެއެވެ. އެމީހުން އެވާހަކަ ދައްކާނީ އެމީހުންނަށް ވިސްނޭގޮތަށެވެ.  

ދެންމެ މިދެއްކި ވާހަކައިގައި "ކަލާނގެ ކުޅަދުންވަންތަކަމާއި ހުރިހާ ބާރުތަކެއް ލިބިގެންވަނީ ކަލާނގެއަށްކަން ވިސްނައިލުމަށް ހިނދުކޮޅެއް ހޭދަކުރަންވާނެއެވެ." އެބުނާ ބުނުން "ފަތިސްނަމާދުކޮށް ޛިކުރުކުރަންވާނެއެވެ." މިގޮތަށް ބަދަލުކޮށްލުމުން ދެން އެބުނާ ހުރިހާ ވާހަކަތަކަކީވެސް މުސްލިމުންވެސް ޤަބޫލުކުރާ ވާހަކަތަކެވެ.  

ވީމާ މިއެނގެނީ ތަނަވަސްކަން އިތުރުކުރަން ބޭނުންވާ މީހަކުނަމަ ކަންނެތްވެ ފަތިސްނަމާދަށް ނުހޭލައި ނިދަން އޮވެގެން އެކަން ކާމިޔާބުނުކުރެވޭނެ ކަމެވެ. ފުރަތަމަ ކަމަކަށް ފަތިހު ހޭލައި ފަތިސްނަމާދުން ދުވަސް ފަށަންޖެހޭ ކަމެވެ.  

ލޮބުވެތި އެކުވެރިންނޭވެ! އެންމެންނަށްވެސް އުޅެންޖެހިފައި މިވަނީ ތަނަވަސްކަން ކުޑަވެގެންނެވެ. މަސައްކަތް މިކުރަނީ ތަނަވަސްކަން އިތުރުކުރާށެވެ! ވީމާ ފަތިސް ނަމާދުން ދުވަސް ފަށަން ސަމާލުކަންދޭށެވެ. އެއީ އެންމެ މުހިންމު ކަންތައް ކަމަށް ދެކޭށެވެ. އެމީހަކަށް ކާމިޔާބީ މިނަވްރުކުރައްވަވާނެތެވެ. އިން ޝާ ﷲ

- ސްލާމީ ތިލަފަތުގެ ދަރުސަކުން