މެރިކަލްޗަރގެ ދާއިރާއިން ބޭނުންވާ ފަންނީ ހުނަރު އުނގަންނައިދީ، ފަރުމަސް އާލާކުރުމުގެ މަސައްކަތަށް ޝައުޤުވެރިވާ މީހުން ބިނާކުރުމުގެ ގޮތުން ހިންގާ "މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމް"ގެ މިއަހަރުގެ 4 ވަނަ ކޯހުގައި ބައިވެރިވުމުގެ ފުރުސަތު ހުޅުވާލައިފިއެވެ.
މިއީ މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއާއި މޯލްޑިވްސް މެރިން ރިސާރޗް އިންސްޓިޓިއުޓް (އެމްއެމްއާރުއައި) ގުޅިގެން، ވޯލްޑް ބޭންކުގެ އެހީގައި ތަންފީޒުކުރާ "ޓްރާންސްފޯމް ޕްރޮޖެކްޓް"ގެ ދަށުން ކުރިއަށްގެންދާ ހާއްސަ ތަމްރީނު ޕްރޮގްރާމެކެވެ.
ކ. މަނިޔަފުށީ ރިސާރޗް އެންޑް ޓްރެއިނިންގ ފެސިލިޓީގައި 14 ދުވަހުގެ މުއްދަތަށް ކުރިއަށްގެންދާ މި އަސާސީ މެރިކަލްޗަރ ކޯސް ތާވަލުކުރެވިފައިވަނީ އޮކްޓޯބަރު 31 އިން ނޮވެމްބަރު 12 ގެ ނިޔަލަށެވެ. ޖުމްލަ 15 ބައިވެރިންނަށް ފުރުސަތު ދިނުމަށް ހަމަޖެހިފައިވާ މި ޕްރޮގްރާމުގައި އަމަލީ އަދި ތިއަރީ ބައިތައް އުނގަންނައިދެވޭނެއެވެ.
މި ކޯހުގައި މައިގަނޑު ގޮތެއްގައި އުނގަންނައިދިނުމަށް ހަމަޖެހިފައިވާ ބައިތަކުގެ ތެރޭގައި އެކުއަކަލްޗަރ ނިޒާމުތަކާއި ދިރޭ ކަނާ އާލާކުރުމާއި، ފާނައާއި ދިވެހި މާގަނޑުމަސް އަދި ހުއިފިލަނޑާ ވިއްސައި ކުދިދިރުން ބޮޑުކުރުން ހިމެނެއެވެ. މީގެއިތުރުން އިތާމުތް އާލާކުރުމާއި މޫދުވިނަ (ސީވީޑް) ހައްދައި އާލާކުރުމާއި، ދިރުންތަކަށް ޖެހޭ ބަލިތައް ދެނެގަތުމާއި ބަލިތަކުން ރައްކާތެރިކުރުމުގެ އިތުރުން، ދިރުން އާލާކުރުމުގައި ތިމާވެށި ރައްކާތެރިކުރުމުގެ މުހިންމު އުސޫލުތައް ކިޔަވައިދެވޭނެއެވެ.
މި ތަމްރީނު ޕްރޮގްރާމުގައި ބައިވެރިވާން އެދޭ ފަރާތްތަކުން މިމަހުގެ 18 ވާ ބުރާސްފަތި ދުވަހުގެ 14:00 އަށް ފޯމު ފުރިހަމަކުރުމަށްފަހު، އައިޑީކާޑުގެ ކޮޕީއާއެކު މޯލްޑިވްސް މެރިން ރިސާރޗް އިންސްޓިޓިއުޓަށް ހުށަހަޅަންޖެހެއެވެ. އަދި އީމެއިލް މެދުވެރިކޮށް ފޯމު ހުށަހަޅާނީ [email protected] އަށެވެ.
