އޮންލައިންކޮށް ވިޔަފާރިކުރާ ޕްލެޓްފޯމެއް ކަމަށްވާ ގްލޯބަލް ދުކާން މެދުވެރިކޮށް ވިޔަފާރިކުރާ ދިވެހިންނަށް، މޯލްޑިވްސް ޕޯސްޓް މެދުވެރިކޮށް ދިވެހި ރުފިޔާއިން ފައިސާ ދެއްކޭނެ އިންތިޒާމު ހަމަޖައްސައި އެ ޚިދުމަތް ރަސްމީކޮށް ތައާރަފުކޮށްފިއެވެ.
މި ޚިދުމަތުގެ ދަށުން ގްލޯބަލް ދުކާންއިން ވިޔަފާރިކޮށް ޗެކްއައުޓް ކުރާ ވަގުތު 'ޕޭ ތުރޫ މޯލްޑިވްސް ޕޯސްޓް' އިޚުތިޔާރު ކުރުމުން، އެޕްލިކޭޝަން މެދުވެރިކޮށް ފައިސާ ދެއްކުމަށް ޚާއްސަ ޕޭމަންޓް ލިންކެއް ލިބިގެންދާނެއެވެ. މިއާއެކު ބޭރު ފައިސާ ބޭނުންކުރުމުގެ ބަދަލުގައި، ކަސްޓަމަރުންނަށް ފަސޭހަކަމާއެކު ދިވެހި ރުފިޔާއިން އަގު އަދާކުރުމުގެ ފުރުސަތު ފަހިވެގެންދާނެއެވެ.
މީގެއިތުރުން، މޯލްޑިވްސް ޕޯސްޓާއި އިންޑިއާ ޕޯސްޓް ގުޅިގެން ކުރިއަށްގެންދާ މި އިންތިޒާމުގެ ތެރެއިން، ގަންނަ ތަކެތި ރާއްޖޭގެ ކޮންމެ ހިސާބަކަށްވެސް ޑެލިވަރީ ކޮށްދިނުމުގެ ޚިދުމަތް ދިނުމަށް ވަނީ ހަމަޖެހިފައެވެ.
ގްލޯބަލް ދުކާން މެދުވެރިކޮށް ވިޔަފާރިކުރުމަށް އިންޑިއާގެ އެޑްރެހެއް ބޭނުންނުވާއިރު، މި ޕްލެޓްފޯމް މެދުވެރިކޮށް އެމެޒޯން، ފްލިޕްކާޓް އަދި މިންތްރާ ފަދަ މަގުބޫލު އެތައް ޕްލެޓްފޯމަކުން ފަސޭހަކަމާއެކު ވިޔަފާރިކޮށްލުމުގެ ފުރުސަތު ދިވެހިންނަށް ލިބިގެންދެއެވެ.
