ށ. ފީވަކު ޞިއްޙީ މަރުކަޒުގެ އެކްސްޓެންޝަން އިމާރާތް ރަސްމީކޮށް ހުޅުވައި، އެ މަރުކަޒުން ދެމުން އަންނަ ޚިދުމަތްތައް 24 ގަޑިއިރަށް ބަދަލުކޮށްފިއެވެ. މި އައު އިމާރާތް ރަސްމީކޮށް ހުޅުއްވައިދެއްވީ ޞިއްޙަތާއި ޢާއިލާއާއި އިޖްތިމާޢީ އެހީއާ ބެހޭ ވަޒީރު ޤީލާ ޢަލީއެވެ.
އައު އެކްސްޓެންޝަން އިމާރާތް ހުޅުވުމާއެކު، މީގެ ކުރިން 16 ގަޑިއިރު ދެމުން އައި ޞިއްޙީ ޚިދުމަތްތައް މިހާރު ވަނީ މެދުކެނޑުމެއްނެތި 24 ގަޑިއިރު ލިބޭނެ އިންތިޒާމު ހަމަޖައްސައިދީފައެވެ. މި ބަދަލާއެކު ރަށުގެ ރައްޔިތުންނަށް ފަސޭހަކަމާއެކު އަވަސް ފަރުވާ ލިބިގެންދާނެއެވެ.
މީގެއިތުރުން، މި އައު އިމާރާތާއެކު މަރުކަޒުގެ އިދާރީ ހިންގުން އިތުރަށް ހަރުދަނާވެގެންދާނެއެވެ. އެގޮތުން އިދާރީ ޚިދުމަތްތަކާއި ޕަބްލިކް ހެލްތު ޔުނިޓުގެ މަސައްކަތްތައް މިހާރު ވަނީ އައު އިމާރާތަށް ބަދަލުކުރެވިފައެވެ.
މި ރަސްމިއްޔާތުގައި ފާހަގަކުރެއްވި ގޮތުގައި، ވަޒީރުގެ މައިގަނޑު އަމާޒަކީ ބަލިތަކުން ރައްކާތެރިވުމުގެ އާދަ އަށަގަންނަވައި، ށ. ފީވަކަކީ އާންމު ޞިއްޙަތުގެ ނަމޫނާ ރަށަކަށް ހެއްދެވުމެވެ.
