ސްކޫލްތައް ފެށޭ ވަގުތުތަކުގައްޔާއި ނިމޭ ވަގުތުތަކުގައި މަގުމަތީގައި ބޮޑެތި ލޮރީތަކާއި ބަރު އުޅަނދުތައް ދުއްވާތީ ދިމާވާ ދަތިތަކާ މެދު ކަންބޮޑުވުން ފާޅުކުރި ގްރޭޑް 9 ގެ ދަރިވަރަކަށް، އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު އުފާވެރި ޖަވާބެއް ދެއްވައިފިއެވެ.
ސަރުކާރުން ބޭއްވި "އަހާ" ފޯރަމްގެ ތެރެއިން އެ ދަރިވަރު ކުރި ސުވާލަށް ޖަވާބުދެއްވަމުން ވަޒީރު ވިދާޅުވީ، ސްކޫލް ކުދިންނާއި އާންމު ރައްޔިތުން މަގުމައްޗަށް ނުކުންނަ ވަގުތުތަކަކީ ރައްކާތެރި، ތޮއްޖެހުން ކުޑަ ވަގުތުތަކަކަށް ހެދުމަކީ މި ސަރުކާރުން ހާއްސަ އަހައްމިއްޔަތުކަމެއް ދެއްވާ ކަމެއް ކަމަށެވެ. އަދި އެކަމަށް ހައްލެއް ހޯދައިދިނުމުގެ ގޮތުން އެންމެންނަށް ފަސޭހަވާނޭ ފަދަ ހަމަހަމަ ސިޔާސަތެއް އެކުލަވާލައި، ވަރަށް އަވަހަށް ތަންފީޒުކުރަން ފަށާނެ ކަމުގެ އުފާވެރި ޔަގީންކަން ވަޒީރު އެ ދަރިވަރަށް ދެއްވިއެވެ.
"އާންމު ރައްޔިތުންނާއި ދަރިވަރުންގެ ރައްކާތެރިކަން އިސްކޮށް، ވިޔަފާރިވެރިންނަށް އުފުލަންޖެހޭ ތަކުލީފު އެންމެ ކުޑަވާނޭ ގޮތަކަށް މިކަން ނިންމަންޖެހެނީ. އަޅުގަނޑު އަރުވަން ބޭނުންވާ ޔަގީންކަމަކީ ވަރަށް އަވަހަށް ސަރުކާރުން އެ ސިޔާސަތު އެކަށައަޅައި ތަންފީޒުކުރަން ފަށާނެ ކަން،" ވަޒީރު ވިދާޅުވިއެވެ.
ވަޒީރު ސައީދު ފާހަގަކުރެއްވި ގޮތުގައި، މީގެކުރިން ބަރު އުޅަނދު ދުއްވާ ގަޑިތަކަށް ބަދަލު ގެނައުމުން ވިޔަފާރިތަކަށް ދަތިތަކާ ކުރިމަތިލާން ޖެހުނު ކަމުގެ ޝަކުވާތައް ލިބިފައިވެއެވެ. އެހެންކަމުން، މި ސަރުކާރުގެ ވިސްނުމަކީ ވިޔަފާރިތަކަށާއި ސިނާއީ މަސައްކަތްތަކަށް ހުރަސްނޭޅޭނޭހެން، އަދި ހަމައެއާއެކު ދަރިވަރުންނާއި އާންމުންގެ މަސްލަހަތާއި ސަލާމަތްތެރިކަން އިސްކުރެވިގެން ދެމެހެއްޓެނިވި ހައްލެއް ގެނައުމެވެ.
މީގެއިތުރުން، އެއްގަމު ދަތުރުފަތުރާއި ޕާކިންގްގެ ކަންކަން ހަރުދަނާ އުސޫލެއްގެ ތެރެއަށް ފެއްތުމަށްޓަކައި އެކުލަވާލެވުނު އައު ގާނޫނަށް މި އޮކްޓޯބަރު މަހުގެ 1 ވަނަ ދުވަހުން ފެށިގެން އަމަލުކުރަން ފަށާފައިވާކަން ފާހަގަކުރައްވަމުން ވަޒީރު ވިދާޅުވީ، ސަރުކާރުގެ އެންމެ އިސް ވާޖިބަކީ ރައްޔިތުންގެ ފުރާނައާއި މުދަލުގެ ރައްކާތެރިކަން ކަށަވަރުކުރުން ކަމަށާއި، މި ގަވާއިދުތައް އެއްވެސް އިސްތިސްނާއެއް ނެތި ފުރިހަމައަށް ތަންފީޒުކުރެވިގެންދާނެ ކަމަށެވެ.
