ދިވެހިރާއްޖޭގެ ކަނޑުގެ ސަރަހައްދު ހިމާޔަތްކޮށް، ދިފާއީީ ބާރުގެ އޮޕަރޭޝަނަލް ޤާބިލުކަން އިތުރު ފެންވަރަކަށް ގެންދިއުމުގެ ގޮތުން އެމްއެންޑީއެފް ކޯސްޓްގާޑަށް އިތުރު 17 އުޅަނދެއް ހޯދުމުގެ މަސައްކަތް ބާރަށް ކުރިއަށްދާ ކަމަށާއި ބައެއް އުޅަނދުތައް އަންނަ މަހު ލިބޭޏެ ކަމަށް ދިފާއީީ އަދި ވަތަނީ ޚިދުމަތާބެހޭ ވަޒީރު ހަސަން ރަޝީދު ހާމަކުރައްވައިފިއެވެ.
ސަރުކާރުން ބޭއްވި "އަހާ" ފޯރަމްގެ ތެރެއިން، ޤައުމަށް ދިމާވެދާނެ ނުރައްކާތެރި ކޮންމެ ދަނޑިވަޅަކަށް ސިފައިންގެ ތައްޔާރީ ހާލަތާ ގުޅޭގޮތުން އާންމު ރައްޔިތަކު ދެންނެވި ސުވާލަކަށް ޖަވާބުދެއްވަމުން ވަޒީރު ވިދާޅުވީ، ޤައުމީ ދިފާއީ ބާރު އަބަދުވެސް އޮންނަނީ ސަމާލުވެ ރައްކާތެރިކަމުގެ ފިޔަވަޅުތަކާއެކު ކަމަށެވެ. އެހެންނަމަވެސް، އެ މަސައްކަތް އެންމެ އެދެވޭ ގޮތުގައި ކުރިއަށް ގެންދެވޭނީ ޒަމާނީ އަސްކަރީ ވަސީލަތްތައް ފުރިހަމައަށް ލިބިގެން ކަމުގައި ވަޒީރު ފާހަގަކުރެއްވިއެވެ.
ރާއްޖޭގެ ބޮޑު ސަރަހައްދަކީ ކަނޑުގެ ސަރަޙައްދު ކަމަށްވުމުން، އެ ސަރަޙައްދު ޕެޓްރޯލްކޮށް ބެލެހެއްޓުމަށްޓަކައި އަލަށް ގެންނަ އުޅަނދުތަކުގެ ތެރެއިން ބައެއް އުޅަނދުތައް އަންނަ ނޮވެމްބަރު މަހުގެ ތެރޭގައި ޚިދުމަތަށް ނެރެވޭނެ ކަމަށް ވަޒީރު ވިދާޅުވިއެވެ. މީގެއިތުރުން މިހާރުވެސް 3 އުޅަނދެއް މުޅިން އަލަށް ގެނެސްފައިވާ ކަމަށާއި، ރައްޔިތުންނަށް ބޭނުންވާ ޞިއްހީީ ޚިދުމަތްތައް ފުޅާކުރުމަށް 12 ސީ-އެމްބިއުލާންސް ބަނުމުގެ މަސައްކަތްވެސް ބާރަށް ކުރިއަށްދާ ކަމަށް ވިދާޅުވިއެވެ.
"ވަސީލަތްތައް އިތުރުކުރުމަށް ރައީސް ޑރ.މުޙައްމަދު މުޢިއްޒު ގިނަ މަސައްކަތްތަކެއް ކުރައްވާ. އިތުރު އުޅަނދުތަކާއި އިތުރު ވަސީލަތްތައް އިތުރުކޮށް ކެޕޭސިޓީ ވަރުގަދަކުރައްވަން އިސްކަން ދެއްވާ." ވަޒީރު ވިދާޅުވިއެވެ.
ސަރުކާރުން ވަނީ އެއާ އެމްބިއުލާންސްގެ ހިދުމަތް ވެސް ފަށާފަ އެވެ. އެ ހިދުމަތުން މިހާތަނަށް 3,000 ވުރެ ގިނަ މީހުން އުފުލާފައިވެއެވެ.
މި ސަރުކާރުން ރާއްޖޭގެ ޚާރިޖީ ގުޅުންތަކުގެ ބޭނުން ހިފައިގެން އަސްކަރިއްޔާ ވަރުގަދަކުރުމަށް ގިނަ މަސައްކަތްތަކެއް ކުރެވިފައިވާކަން ވަޒީރު ފާހަގަކުރެއްވިއެވެ. އެގޮތުން، ތުރުކީވިލާތާއި އޮސްޓްރޭލިއާ ސަރުކާރުގެ އެހީތެރިކަމާއެކު ދެ މަނަވަރު ހޯދިފައިވާއިރު، ރާއްޖޭގެ ވައިގެ ސަރަޙައްދު ބެލެހެއްޓުމަށް އަސްކަރީ ޑްރޯންގެ ޚިދުމަތްވެސް މިހާރު ވަނީ ފަށާފައެވެ.
ވަޒީރު ވިދާޅުވީ، ސަރުކާރުގެ މި ހުރިހާ މަސައްކަތްތަކުގެ މައިގަނޑު އަމާޒަކީ ދިވެހިރާއްޖޭގެ ކަނޑާއި ވައިގެ ސަރަޙައްދުގެ އިސްތިޤްލާލު ފުރިހަމައަށް ޙިމާޔަތްކޮށް، ދިމާވެދާނެ ކޮންމެ ނުރައްކަލަކުން ޤައުމު ސަލާމަތްކުރުމުގެ ޤާބިލުކަން ކަށަވަރުކުރުން ކަމަށެވެ.
