މާލެ ސަރަހައްދުގެ އުސް އިމާރާތްތަކުގައި ހިނގާ ނުރައްކާތެރި އަލިފާނުގެ ހާދިސާތައް ކޮންޓްރޯލްކޮށް އަވަހަށް ނިއްވާލުމަށްޓަކައި ޒަމާނީ ޑްރޯން ޓެކްނޮލޮޖީ ބޭނުންކުރަން ފެށުމަށް ތައްޔާރުވަމުން އަންނަކަން ދިފާއީީ އަދި ވަތަނީ ޚިދުމަތާބެހޭ ވަޒީރު ހަސަން ރަޝީދު ހާމަކުރައްވައިފިއެވެ.
ސަރުކާރުން ބޭއްވި "އަހާ" ފޯރަމްގައި އާންމުންގެ ފަރާތުން ހުށަހެޅުނު ސުވާލުތަކަށް ޖަވާބުދެއްވަމުން ވަޒީރު ވިދާޅުވީ، ޑްރޯން ބޭނުންކޮށްގެން އަލިފާން ނިއްވުމުގެ ޓެސްޓުތަކާއި އެކްސްޕެރިމެންޓްތައް މިހާރު ކާމިޔާބުކަމާއެކު ކުރިއަށް ގެންދެވިފައިވާ ކަމަށެވެ. އަދި މި އަހަރު ނިމުމުގެ ކުރިން ނުވަތަ އަންނަ އަހަރުގެ ކުރީކޮޅުގައި މި ޚިދުމަތް އަމަލީ ގޮތުން ބޭނުންކުރަން ފެށޭނެ ކަމަށް ލަފާކުރެވޭ ކަމަށް އެމަނިކުފާނު ފާހަގަކުރެއްވިއެވެ.
މާލޭގައި އަލިފާނުގެ ހާދިސާތައް އިތުރުވަމުންދާ މައިގަނޑު ސަބަބުތަކަށް އަލިއަޅުއްވާލައްވަމުން ވަޒީރު ވިދާޅުވީ، ދިރިއުޅުމުގެ ޖާގައިގެ ދަތިކަމާއި ތޮއްޖެހިފައިވާ މާހައުލުތަކުގެ އިތުރުން، ގަވާއިދާ ޚިލާފަށް ކަރަންޓު ވައިރުކުރުމުގެ ސަބަބުން ޝޯޓްވުމަކީ މިފަދަ ހާދިސާތައް ހިނގަން މެދުވެރިވާ މައިގަނޑު ސަބަބުތައް ކަމަށެވެ. އަދި ހަނި ގޯޅިތަކަށް އަލިފާން ނިއްވާ ލޮރީތަކަށް ނުވަދެވުމާއި، ފެންހޮޅި ހުންނަ ތަންތަނުގައި އުޅަނދުފަހަރު ޕާކުކޮށްފައި ހުރުމަކީ ސިފައިންނަށް ކުރިމަތިވާ ބޮޑު ގޮންޖެހުމެއް ކަމުގައި ފާހަގަކުރެއްވިއެވެ. ނަމަވެސް، ޗައިނާ ސަރުކާރުގެ އެހީގައި ކުރިއަށްގެންދާ މާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ މަޝްރޫޢާއެކު މި މައްސަލަތަކަށް ދާއިމީ ހައްލެއް ލިބިގެންދާނެ ކަމަށް ވިދާޅުވިއެވެ.
މީގެ އިތުރުން، ގޭސް ލީކުވުމުގެ ސަބަބުން ހިނގާ ނުރައްކާތަކުން ރައްކާތެރިވުމަށްޓަކައި، ބާޒާރުގައި ވިއްކާ ގޭސް ރެގިއުލޭޓަރުތަކުގެ ވަކި ޚާއްޞަ މިންގަނޑެއް (ސްޓޭންޑަޑެއް) ކަނޑައަޅައި، އެ މިންގަނޑަށް ނުފެތޭ ތަކެތި ބޭނުންކުރުން ހުއްޓުވުމަށް މަސައްކަތް ކުރަމުންދާ ކަމަށްވެސް ވަޒީރު ވިދާޅުވިއެވެ. އަދި ގޭސް ސަޕްލައިކުރާ ފަރާތްތަކާ ގުޅިގެން ރައްކާތެރިކަމުގެ ފިޔަވަޅުތައް ވަރުގަދަކޮށް، އާންމުން ހޭލުންތެރިކުރުމުގެ ޕްރޮގްރާމްތައް މެދުކެނޑުމެއްނެތި ކުރިއަށް ގެންދާކަން އެމަނިކުފާނު ފާހަގަކުރެއްވިއެވެ.
ފާއިތުވި ދުވަސްތަކުގައި މާލޭގައި ހިނގި އަލިފާނުގެ ނުރައްކާތެރި ބޮޑެތި ހާދިސާތަކުގައި ބޮޑެތި ގެއްލުންތަކެއް ލިބި މީހުންގެ ފުރާނަ ގެއްލިފައިވާއިރު، ރައްޔިތުންނާއި މުދަލުގެ ރައްކާތެރިކަން ކަށަވަރުކުރުމަށް ދިވެހި ސިފައިން އަބަދުވެސް ފުރިހަމަ ތައްޔާރީ ޙާލަތުގައި ތިބޭނެ ކަމުގެ ޔަގީންކަން ވަޒީރު ވަނީ ދެއްވާފައެވެ.
