ދިވެހިރާއްޖޭގެ މިނިވަންކަމާއި ސިޔާދަތަށް ނުރައްކާވާނެ ފަދަ ކޮންމެ ކަމަކާ ކުރިމަތިލުމަށް ދިވެހި އަސްކަރިއްޔާ އޮތީ ފުރިހަމަ ތައްޔާރީ ހާލަތުގައި ކަމަށާއި، 1988 ވަނަ އަހަރުގެ ނޮވެމްބަރު 3 ގައި ރާއްޖެއަށް ދިން ފަދަ އުދުވާނީ ޓެރަރިސްޓް ހަމަލާއެއް ދިނުމުގެ ފުރުސަތު ދެން އެއްވެސް ބަޔަކަށް ނުލިބޭނެ ކަމުގެ ފުރިހަމަ ޔަގީންކަން ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު ދެއްވައިފިއެވެ.
ސަރުކާރުން ބޭއްވި "އަހާ" ފޯރަމްގައި އާންމު ރައްޔިތަކު ކުރި ސުވާލަކަށް ޖަވާބު ދެއްވަމުން ވަޒީރު ވިދާޅުވީ، ރާއްޖޭގެ ވައިގެ ސަރަހައްދާއި ވަށައިގެންވާ ބޮޑު ކަނޑުގެ ސަރަހައްދުން ކުރިމަތިވެދާނެ ކޮންމެ ނުރައްކަލަކުން ގައުމު ދިފާއުކުރުމުގެ ފުރިހަމަ ގާބިލުކަން މިއަދު ދިވެހި ސިފައިންގެ ކިބައިގައި އެބަހުރި ކަމަށެވެ. މީގެ 30 އަށް ވުރެ ގިނަ އަހަރު ކުރިން ހިނގައިދިޔަ ނޮވެމްބަރު 3 ގެ ހިތާމަވެރި ހާދިސާއަކީ ދިވެހިން ތަހައްމަލުކުރި ވަރަށް ނުރައްކާތެރި ތަޖުރިބާއެއްކަން ފާހަގަކުރައްވަމުން ވަޒީރު ވިދާޅުވީ، މިހާރު ރާއްޖޭގެ ދިފާއީ އައްޑަނަ ވަރުގަދަކުރެވިފައިވާ މިންވަރުން އެފަދަ ހަމަލާއެއް ތަކުރާރުވިޔަ ނުދޭނެ ކަމަށެވެ.
ވަޒީރު އިތުރަށް ފާހަގަކުރެއްވި ގޮތުގައި، ގައުމީ ދިފާއީ ބާރުގެ ހިންގުން ހަރުދަނާކޮށް، ގައުމު ހިމާޔަތްކުރުމަށް އެންމެ ޒަމާނީ ވަސީލަތްތައް ހޯދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވި ފަހުން ވަނީ ވަރަށް މުހިންމު މަސައްކަތްތަކެއް ފައްޓަވާފައެވެ. އެގޮތުން ދިވެހި އަސްކަރިއްޔާގެ ތާރީޚުގައި އަލަށް އަސްކަރީ ޑްރޯން ބޭނުންކޮށްގެން ވައިގެ މަގުން ރާއްޖޭގެ ސަރަހައްދު ބަލަހައްޓަން ފެށުމާއި، ތުރުކީންނާއި އޮސްޓްރޭލިއާ ސަރުކާރުގެ އެހީގައި މަނަވަރު ހޯދައި ސިފައިންގެ ގާބިލުކަން އިތުރުކުރެވިފައިވާކަން ފާހަގަކުރެއްވިއެވެ.
މީގެ އިތުރުން، ކޯސްޓްގާޑުގެ އޮޕަރޭޝަންތައް ވަރުގަދަކުރުމަށް ޕެޓްރޯލް ކުރާ އިތުރު ތިން އުޅަނދެއް މިހާރު ހޯދާފައިވާއިރު، ކުރިއަށް އޮތް ތަނުގައި އިތުރު 17 އުޅަނދެއް ހޯދުމުގެ މަސައްކަތް ބާރަށް ކުރިއަށްދާ ކަމަށް ވަޒީރު ވިދާޅުވިއެވެ. މީގެ ތެރެއިން ބައެއް އުޅަނދުތައް އަންނަ ނޮވެމްބަރު މަހު ރާއްޖެ ގެނެވޭނެ ކަމަށާއި، ކަނޑުމަތީގެ ސިއްހީ ޚިދުމަތްތައް ހަރުދަނާކުރުމަށް 12 ސީއެމްބިއުލާންސް ބަނުމުގެ މަސައްކަތް ވެސް ހިނގަމުންދާ ކަމަށް އޭނާ ހާމަކުރެއްވިއެވެ.
ރާއްޖޭގެ ބޮޑުބައެއް ކަނޑުގެ ސަރަހައްދަށް ވެފައި، އެ ސަރަހައްދުން ލިބޭ ނަފާ އިތުރުކުރުމަށް ސަރުކާރުން އިސްކަންދެމުންދާ މި ދަނޑިވަޅުގައި، ބޭރުގެ އެއްވެސް ނުރައްކަލަކަށް ޖާގަ ނުދީ ދިވެހި އަސްކަރިއްޔާއިން ގައުމު ހިމާޔަތްކުރާނެ ކަމުގެ ފުރިހަމަ އިތުބާރު ވަޒީރު ވަނީ ދެއްވާފައެވެ.
1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހު ރާއްޖެއަށް ދިން ކުލީ ސިފައިންގެ ނުރައްކާތެރި ހަމަލާގައި ގައުމު ދިފާއުކުރަން އުޅުމުގެ ތެރޭގައި ސިފައިންގެ 8 ބޭކަލަކާއި އާންމު ރައްޔިތުންގެ 11 މީހަކު ހިމެނޭހެން ޖުމްލަ 19 ދިވެހިން ވަނީ ޝަހީދުވެފައެވެ.
