އެއްގަމު ދަތުރުފަތުރުގެ ނިޒާމު ހަރުދަނާކޮށް، ޤާނޫނު ތަންފީޒުކުރުމުގެ މަސައްކަތްތައް ޑިޖިޓަލް ކުރުމުގެގޮތުން ޚާއްޞަ އެޕްލިކޭޝަންތަކާއި އިލެކްޓްރޯނިކް ވަސީލަތްތައް މެދުވެރިކޮށް ފިޔަވަޅު އަޅަން ފެށުމަށް އިގުތިޞާދީ ތަރައްޤީއާ ދަތުރުފަތުރާބެހޭ ވުޒާރާއިން ނިންމައިފިއެވެ. މި ބަދަލާއެކު، ކުރިއަށް އޮތް 7 ދުވަހުގެ ތެރޭގައި މި ނިޒާމުގެ ދަށުން ތަންފީޒީ އިދާރާތަކުގެ އަމަލީ މަސައްކަތްތައް ރަސްމީކޮށް ފެށިގެންދާނެއެވެ.
މި ނިޒާމު ތަންފީޒުކުރުމުގައި ދިވެހި ފުލުހުންގެ ޚިދުމަތުން ޤަވާއިދާ ޚިލާފުވާ ފަރާތްތަކަށް އަޅާ ފިޔަވަޅުތަކުގެ މަޢުލޫމާތު، އެސްއެމްއެސް އަދި އީމެއިލް މެދުވެރިކޮށް ޙިއްޞާކުރަމުން ގެންދާނެ ކަމަށް ދަތުރުފަތުރާބެހޭ ވުޒާރާއިން ހާމަކުރައްވައެވެ. އެހެންކަމުން، ފިޔަވަޅުތަކާ ގުޅޭ މަޢުލޫމާތު އުޅަނދު ދުއްވާ ފަރާތްތަކަށް ސީދާ ލިބޭނެ އިންތިޒާމު ހަމަޖެއްސުމަށްޓަކައި، މިހާރު ބޭނުންކުރަމުންދާ ފޯނު ނަންބަރާއި އީމެއިލް އެޑްރެސް ސިމްސް (SIMS) ޕޯޓަލް މެދުވެރިކޮށް ވީއެންމެ އަވަހަކަށް އަޕްޑޭޓް ކުރުމަށް އެ ވުޒާރާއިން ވަނީ އިލްތިމާސްކުރައްވާފައެވެ.
މާލެއާއި ހުޅުމާލޭގައި ޤަވާއިދާ ޚިލާފަށް ޕާކުކުރާ އުޅަނދުތަކާމެދު ފިޔަވަޅު އެޅުމުގައި، ފުރަތަމަ މަރުޙަލާގައި ޚާއްޞަ އިސްކަމެއްދީގެން ބަލާނެ ސަރަޙައްދުތަކާއި މަގުތައް މިހާރު ވަނީ ކަނޑައަޅާފައެވެ. އޭގެތެރޭގައި ހޮސްޕިޓަލުތަކާއި ސްކޫލުތައް ހުންނަ ސަރަޙައްދުތަކުގެ އިތުރުން، ކަފިހި ހުރަސްތަކާއި ޚާއްޞަ އެހީއަށް ބޭނުންވާ ފަރާތްތަކުގެ އުޅަނދުތަކަށް ޚާއްޞަކޮށްފައިވާ ސްލޮޓުތައް ހިމެނެއެވެ.
އެގޮތުން މާލޭގެ މަޖީދީމަގު، އަމީނީ މަގު، ސޯސަން މަގު އަދި ބޮޑުތަކުރުފާނު މަގުގެ އިތުރުން، ހުޅުމާލެ ފޭސް 1 އަދި ފޭސް 2 ގެ މައިގަނޑު މަގުތަކުގައި މި ޑިޖިޓަލް ނިޒާމުގެ ތެރެއިން ޤަވާއިދާ ޚިލާފަށް ޕާކްކުރާ އުޅަނދުތައް ބަލައި ފިޔަވަޅު އަޅަމުންދާނެ ކަމަށް އެ ވުޒާރާއިން މަޢުލޫމާތު ދެއްވައެވެ.
