އަހުރެން މިހެން ބުނުމުން ބައެއް މީހުން ނުރުހުމުގެ ބަސް ބުނެއެވެ. އެއީ ރަނގަޅު ގޮތުގައި ދަރިން ތަރުބިއްޔަތުކުރުމުންވެސް އަލައިނުލާ ކުދިން ތިބޭތީއެވެ. އެކަމަކު ބުނަންހެއްޔެވެ؟ އެއީ ނިޞްބަތުން ވަރަށް މަދު ބައެކެވެ. އެހެންވެ މިރޭވެސް ތަކުރާރުކޮށްލާނަމެވެ. މުސްކުޅިވާ ދުވަހު އެންމެ ރަނގަޅު ޕެންޝަނެއް ލިބެނީވެސް އަދި އާޚިރަތް ދުވަހު އެންމެ ބޮޑު އުފާވެރިކަމެއް ލިބޭ ސަބަބަކީވެސް ދީނަށް ލޯބިކުރާނެ ގޮތަށް ދަރިން ތަރުބިއްޔަތުކުރުމެވެ. އެކަން ކުރެވޭނީ ޙަޔާތަޑް ހެޔޮލަފާ ބައިވެރިއަކު ހޯދިގެންނެވެ.
ކައިވެނިކުރަން އެންމެ ރަނގަޅު މީހަކު ކަނޑައަޅާނީ ކިހިނަކުންކަމާއިމެދު އެކި ގޮތްގޮތަށް ވާހަކަ ދައްކައި ބަހުސް ކުރެވިދާނެއެވެ. އަހުރެން ބުނާނީ ކައިވެނީގެ އެންމެ މުހިންމު މަޤްޞަދަކީ ﷲ ތަޢާލާގެ މަގުގަ ދަރިން ތަރުބިއްޔަތުކުރުން ކަމަށް ހަދައިފި ދެމަފިއަކަށް ޙަޔާތުގަ އޮންނާނީ އުފާވެރިކަން ކަމަށެވެ. ސަބަބަކީ އެފަދަ ދެމަފިރިއަކު އެންމެ ބޮޑަށް ސަމާލުކަންދޭނީ ދެމަފިރިންވެސް ތަޤްވާވެރިވުމަށާއި ނަމޫނާ ދެއްކުމަށް ކަމަށްވާތީއެވެ.
އެފަދަ ދެމަފިރިން ކަންބޮޑުވާނީ އެމީހުންނަށް އަނެކާގެ ކިބައިން ލިބެންވާ ކަމެއް ޙާޞިލުނުވެގެނެއްވެސް ނޫނެވެ. ﷲ ތަޢާލާއަށް އަދާކުރަންޖެހޭ ޙައްޤުތައް އަދާނުކުރެވިގެންކަމަށްވާތީއެވެ.
ޢިލްމުވެރިއަކު ވިދާޅުވެފައިވެއެވެ.
"އެމީހެއްގެ ހިތުގައި ﷲ އަށް ފުރިހަމަ ލޯބި ނެތް އަންހެނަކާއި ކައިވެނި ނުކުރާށެވެ! އެހެނީ ދަރިންގެ ހިތުގައި އިސްލާމް ދީނަށް ލޯބި ޖެއްސުވުމުގެ އެންމެ ބޮޑު ހިއްސާއެއް އަދާކުރަނީ މައިމީހާއެވެ!
އަދި އިސްލާމް ދީނަށް އަމަލު ނުކުރާ ފިރިހެނަކާއިވެސް ކައިވެނި ނުކުރާށެވެ! ދަރިން ލައްވައި އިސްލާމް ދީނަށް އަމަލުކުރުވުމުގަ އިސް ދައުރެއް އަދާކުރަނީ ބައްޕައެވެ!"
މިބަސްފުޅަކީ ވަރަށް ބޮޑު ތެދު ޙަޤީޤަތެކެވެ. އެހެނީ އެމީހެއްގެ ހިތުގައި ﷲ ތަޢާލާއަށް ފުރިހަމަ ގޮތުގައި ލޯބި ނެތް އަންހެނަކާއި ކައިވެނިކޮށްގެން ލިބޭ ދަރިންގެ ހިތުގައި އިސްލާމް ދީނަށް ލޯބި ޖެއްސުވުމަކީ ކުރެވޭނެ ކަމެއް ނޫނެވެ. އެކަންކުރުމުގެ އެންމެ ބޮޑު ހިއްސާއެއް އަދާކުރަންޖެހޭ ފަރާތަކީ މައިމީހާ ކަމުގައިވާތީއެވެ!
ހަމައެފަދައިން އިސްލާމް ދީނަށް އަމަލު ނުކުރާ ފިރިހެނަކާއި ކައިވެނިކޮށްފިނަމަ ލިބޭ ދަރިން ﷲ ތަޢާލާގެ މަގުގައި ތަރުބިއްޔަތުކުރުމަކީ ކުރެވޭނެ ކަމެއް ނޫނެވެ! ސަބަބަކީ ދަރިން ލައްވައި އިސްލާމް ދީނަށް އަމަލުކުރުވުމުގައި އެންމެ އިސް ދައުރެއް އަދާކުރަންޖެހޭ މީހަކީ ބައްޕަ ކަމުގައިވާތީއެވެ.
މިކަމަކީ ކައިވެނިކުރުމުގެ ކުރިން ވަރަށް ބޮޑަށް ވިސްނަންޖެހޭނެ ކަމެކެވެ. އެކަމަށް ނުބަލައި ކއިވެނިކޮށްގެން ދަރިން ލިބޭފަހުން މައްސަލަ ޙައްލުކުރަން އުޅުނަސް ޙައްލެއް ނުކުރެވޭނެތިއެވެ.
ﷲ ތަޢާލާގެ މަގުގަ ދަރިން ތަރުބިއްޔަތުކުރުމުން މުސްކުޅިވާ ދުވަހު އެންމެ ރަނގަޅު ޕެންޝަނެއް ލިބޭނެ ކަމަށް މިބުނަނީ އެކުދިންގެ އަޅައިލުމާއި އެހީތެރިކަން ލިބޭނެތީއެވެ. އަދި އާޚިރަތް ދުވަހު އެންމެ ބޮޑު އުފާވެރިކަމެއް ލިބޭ ސަބަބަކީވެސް ދީނަށް ލޯބިކުރާނެ ގޮތަށް ދަރިން ތަރުބިއްޔަތުކުރުން ކަމަށް މިބުނަނީ އެދރިން ތިބާއަށްޓަކައި ހެޔޮދުޢާކުރާނެތީއެވެ. އަދި ތިބާގެ އާޚިރަތަށް ފައިދާކުރާނެ މަގުން ތިބާއަށްޓަކައި ކަންކަންކުރާނެތީއެވެ.
--އިސްލާމީ ތިލަފަތުގެ ދަރުސަކުން
