މިއަހަރު ފާހަގަކުރާ 46 ވަނަ މަސްވެރިންގެ ދުވަހުގެ މުނާސަބަތުގައި ދިނުމަށް ހަމަޖެހިފައިވާ ޚާއްޞަ އެވޯޑުތަކަށް ކުރިމަތިލުމުގެ މުއްދަތު، މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން އިތުރުކޮށްދީފިއެވެ.
މި އެވޯޑުތަކަށް ނަން ހުށަހެޅުމުގެ އެންމެ ފަހު ތާރީޚެއްގެ ގޮތުގައި ކުރިން ކަނޑައަޅާފައި އޮތް ނަމަވެސް، އިޢުލާނަށް ލިބެމުންދާ ބޮޑު ތަރުޙީބަށް ރިއާޔަތްކޮށް، މިހާރު ވަނީ ނޮވެމްބަރު 7 ވާ ދުވަހުގެ މެންދުރު 12:00 ގެ ނިޔަލަށް އެ ފުރުޞަތު ފަސްކޮށްދީފައެވެ.
ކޮންމެ އަހަރެއްގެވެސް ޑިސެމްބަރު މަހުގެ 10 ވަނަ ދުވަހު ފާހަގަކުރާ މަސްވެރިންގެ ދުވަހުގެ ރަސްމީ ޖަލްސާ މިއަހަރު ބޭއްވުމަށް ހަމަޖެހިފައިވަނީ މާލޭގައެވެ. މި ޖަލްސާގައި މައިގަނޑު ހަތަރު ދާއިރާއަކުން ފާހަގަކޮށްލެވޭ ފަރާތްތަކަށް އެވޯޑު ދިނުމަށް ވަނީ ހަމަޖެހިފައެވެ.
އެވޯޑު ދިނުމަށް ކަނޑައަޅާފައިވާ ދާއިރާތަކަކީ:
- އެންމެ ޚިދުމަތްތެރި ޒުވާން ކެޔޮޅު (35 އަހަރުން ދަށް): މަސްވެރިކަމުގައި ޢަމަލީގޮތުން އުޅޭ، އަދި އާމްދަނީ ހޯދުމަށް މަސްވެރިކަން ފިޔަވައި އެހެން މަސައްކަތެއް ނުކުރާ ޒުވާނުންނަށް.
- އެންމެ ތަޖުރިބާކާރު ކެޔޮޅު (35 އަހަރުން މަތި): ޢަމަލީގޮތުން މަސްވެރިކަމުގައި ދެމިހުރި، ތަޖުރިބާކާރު ކެޔޮޅުންނަށް.
- ޚިދުމަތްތެރި ފަރު މަސްވެރިޔާ: އާމްދަނީ ހޯދުމަށް ކުރާ މައިގަނޑު މަސައްކަތަކަށް ފަރުމަހުގެ މަސްވެރިކަން ކުރާ ފަރާތްތަކަށް.
- ޚިދުމަތްތެރި އަންހެން މަސްވެރިޔާ: މަސްވެރިކަމުގައި ޢަމަލީގޮތުން އުޅޭ އަދި އާމްދަނީ ހޯދުމަށް މަސްވެރިކަން ކުރާ އަންހެން މަސްވެރިންނަށް.
މި އެވޯޑުތަކަށް އެދި ހުށަހެޅުމަށް ބޭނުންވާ ފޯމުތައް މަސްވެރިކަމާ ބެހޭ ވުޒާރާގެ ރަސްމީ ވެބްސައިޓުން ޑައުންލޯޑް ކުރެވެން ހުންނާނެއެވެ. އަދި ފުރިހަމަކޮށްފައިވާ ފޯމުތައް ވުޒާރާގެ އީމެއިލް [email protected] މެދުވެރިކޮށް ހުށަހެޅުމުގެ އިންތިޒާމު ވަނީ ހަމަޖައްސާފައެވެ.
