މިވާހަކަކޮޅު މިބުނަނީ ނުއެނގިތިބެ ނަމަވެސް ބައެއް މީހުންނަށް ސުންނަތަށް ދެކޮޅުހެދޭތީއެވެ. މިޘާލަކަށް ހޯމްދުވަހާއި ބުރާސްފަތި ދުވަހު ރޯދަ ނުހިފޭ މީހަކުވެސް އެކަމަށް ދެކޮޅުހަދައިގެން ނުވާނެއެވެ. އެއީ ކުރަން ނުޖެހޭ ކަމެއް ކަމަށް ނުބުނާށެވެ.
ތެދެކެވެ. ފަރުޟް ކުރައްވަވާފައިވަނީ ހަމައެކަނި ރަމަޟާން މަހުގެ ރޯދައެވެ. ނަމަވެސް އެއިގެ މާނައަކީ ސުންނަތް ރޯދަތައް ހިފަން ނުޖެހުމެއް ނޫނެވެ. ހިފަންޖެހޭ ކަމަށް މިބުނަނީ ހިފުމުން އެމީހަކަށް ﷲ ތަޢާލާ ދެއްވަވާ ޘަވާބު ގިނަކަމުންނެވެ.
ރަނގަޅަށް ވިސްނާށެވެ! ސުންނަތުން ޘާބިތުވާ ކަމެއް ތިމާއަށް ނުކުރެވުނަސް އެސުންނަތަށް އިންކާރުކުރުމަކީ އެއްވެސް މުސްލިމަކު ކޮށްގެންވާނެ ކަމެއް ނޫނެވެ. ހުރިހާ ސުންނަތަށް އެންމެންނަށް ޢަމަލުނުކުރެވިދާނެއެވެ. ނަމަވެސް އިންކާރުކޮށް ޖަދަލުކޮށްގެން ނުވާނެއެވެ. ސަބަބުތައް މިކިޔައިދެނީއެވެ.
"އަދި އެކަލޭގެފާނު އަމިއްލަ އެދުންފުޅަކަށް ވާހަކަފުޅެއް ނުމެދައްކަވާމެއެވެ.(،) އެއީ އެކަލޭގެފާނަށް އިއްވަވާ ވަޙީ އެއްކަމުގައި ނޫނީ ނުވެތެވެ. (.)" (އައްނަޖުމް:3،4)
"ކަލޭގެފާނު ވިދާޅުވާށެވެ! ތިޔަބައިމީހުން، ﷲ އަށް ލޯބިވާކަމުގައި ވަނީނަމަ، ފަހެ، ތިއަބައިމީހުން، ތިމަންކަލޭގެފާނަށް ތަބަޢަ ވާށެވެ! އޭރުން، ﷲ، ތިއަބައިމީހުންދެކެ ލޯބިވެވޮޑިގެންވާނެތެވެ. އަދި، ތިއަބައިމީހުންނަށްޓަކައި، ތިއަބައިމީހުންގެ ފާފަތައް ފުއްސަވައިދެއްވާނެތެވެ. ﷲ އީ، ގިނަގިނައިން ފާފަފުއްސަވާ، ރަހީމް ވަންތަ ރަސްކަލާނގެއެވެ." އާލް ޢިމްރާން: 31)
ﷲ ތައާލާގެ ވަހީ ބަސްފުޅު މިފަދައިން އޮއްވައި ސުންނަތެއް ކަމަށްވުމުން ނުވަތަ ޙަދީޘްފުޅަކަށްވުމުން ފަރުވާކުޑަކޮށްލައިގެން ތިބެވެން ނެތްކަން ވަރަށް ރަނގަޅަށް އެނގެއެވެ. "އެކަލޭގެފާނު އަމިއްލަ އެދުންފުޅަކަށް ވާހަކަފުޅެއް ނުމެދައްކަވާމެއެވެ. އެއީ އެކަލޭގެފާނަށް އިއްވަވާ ވަޙީ ކަމުގައި ނޫނީ ނުވެތެވެ." މިފަދައިން ވަހީކުރައްވަވާފައި އޮތުމުން ޙަދީޘްފުޅުތައް ޤަބޫލުކޮށް ޢަމަލުކުރަންޖެހޭ ކަމުގެ ޔަޤީންކަން ލިބިގެންދެއެވެ.
މީގެ އިތުރުން ﷲ ތަޢާލާ ވަނީ ރަސޫލް (ﷺ) ގެ އަޚްލާޤަށް ތަޢްރީފް ވަޙީކުރައްވައިފައެވެ. ވީމާ ސުންނަތުގައި ހިމެނޭ ކޮންމެ ކަމަކަށްވެސް ޢަމަލުކުރަން ޖެހޭކަން އެނގިގެންދެއެވެ. އަދި ހަމަ މިއާޔަތުން ސުންނަތަށް ޢަމަލުކުރުމަކީ "ﷲ ގެ ދަރުމައާއި، އާޚިރަތު ގެ ޘަވާބަށް އެދޭ، އަދި ގިނަގިނައިން ﷲ ހަނދުމަކުރާ ކަމުގައިވާ މީހަކަށް" ކިހައި މުހިންމުކަމެއްކަންވެސް އެނގިގެންދެއެވެ.
"ހަމަކަށަވަރުން، ﷲ ގެ ރަސޫލާގެ ކިބައިގައި، ތިއަބައިމީހުންނަށް ރިވެތިވެގެންވާ ނަމޫނާއެއްވެއެވެ. (އެއީ) ﷲ ގެ ދަރުމައާއި، އާޚިރަތު ގެ ޘަވާބަށް އެދޭ، އަދި ގިނަގިނައިން ﷲ ހަނދުމަކުރާ ކަމުގައިވާ މީހަކަށެވެ." (އަލްއަޙްޒާބް" 21)
ރަސޫލް (ﷺ)ގެ ސުންނަތާއި ޙަދީޘްފުޅުތަކަށް ޢަމަލުކުރުމުން ލިބިގެންދާނެ ފައިދާ ވެސް ވަނީ ވަޙީ ކުރައްވަވައިފައެވެ.
"އަދި ތިއަކަނބަލުންގެ ތެރެއިން ﷲ އަށާއި، އެކަލާނގެ ރަސޫލާއަށް ކިއަމަންތެރިވެ ޞާލިޙް ކުރާ މީހަކަށް، އެމީހާގެ ދަރުމަ، ތިމަންރަސްކަލާނގެ ދެގުނައަށް ދެއްވާހުށީމެވެ. އަދި ތިމަންރަސްކަލާނގެ އެމީހަކަށްޓަކައި (ސުވަރުގޭގައި) ދީލަތި ދެއްވުމެއް ތައްޔާރު ކުރެއްވީމެވެ." (އަލްއަޙްޒާބް: 31)
ﷲ ތަޢާލާ މިފަދައިން ވަޙީކުރައްވަވާފައިވުމުން "ތިމާ ހަމައެކަނި ޢަމަލުކުރާނީ ކީރިތި ޤުރްއާނުން އެނގެންހުރި ކަންކަމަށް" ކަމަށް ބުނާ މީހުން ވިސްނައިލަންވީ ސުންނަތާއި ޙަދީޘްފުޅުތަކަށް އަމަލުކުރަންޖެހޭކަން ވެސް މިއޮތީ ކީރިތި ޤުރްއާނުން އެނގެން ކަމަށެވެ.
މިދަލީލުތައް މިފަދައިން ފެންނަން ހުއްޓައިވެސް ރަސޫލް (ﷺ)ގެ ސުންނަތެއް ނުވަތަ ޙަދީޘްފުޅެއް ކަމަށް ބުނެވިއްޖެ ނަމަ އަހަރެމެންގެ ތެރެއިން ބައެއް މީހުންނަށް އެކަން ޤަބޫލުކުރެވެނީ މާމުހިންމު ނޫން ކަމެއްގެ ގޮތުގައެވެ. އެއީ އެގޮތަށް ޤަބޫލުކޮށް، ފަރުވާކުޑަކޮށްގެންވާނެ ކަމެއް ނޫންކަން ކީރިތި ޤުރްއާނުގައި ﷲ ތަޢާލާ ވަނީ ވަރަށް ސާފުކޮށް އެއްވެސް އޮޅުމެއް ނެތް ކަމެއްގެ ގޮތުގައި ވަޙީ ކުރައްވަވައިފައެވެ. މިބަޔާންކުރި މިންވަރުންވެސް ވިސްނައި ފިކުރުކުރާ މީހަކަށް ފުދޭނެއެވެ! އިން ޝާ ﷲ
--އިސްލާމީ ތިލަފަތުގެ ދަރުސަކުން
