ޙައިޟުގެ ލޭއައުން ހުއްޓި ރަނގަޅުމުން (ޙައިޟުން ޠޯހިރުވުމަށް) ހިނައި ނުގަނެ ދެމަފިރިންނަށް އެއްދާން ކުރެވިއްޖެނަމަ ހިނައިގަންނަންޖެހޭ ގޮތަކާއިމެދު ބައެއް ކިޔުންތެރިން ސުވާލުކުރައްވައެވެ. ދެ ހިނެއިން އެއްފަހަރާ ބޯމަތިވުމުން ކަންތައްކުރަންޖެހޭނެ ގޮތަކާއިމެދުގައެވެ.
ﷲ ތަޢާލާ ރުހިވޮޑިގަންނަވާނެ ގޮތަށް ޢަމަލުކުރާށެވެ! "ޙައިޟުގެ ލޭ ރަނގަޅުވީ ނަމަވެސް ޖިމާޢު ވާންވާނީ ހިނައި ގަނެފައެވެ. ހިނައި ނުގަނެ ޖިމާޢޫވެއްޖެނަމަ ކައްފާރާ ދޭންޖެހޭނެއެވެ. އަދި ދެކަންތައް އެއްކޮށް ހިތުން ނިޔަތް ގަނެ ހިނައި ގަންނާނީއެވެ."
-- ޑރ. މުޙައްމަދު ޢިޔާޟު ޢަބްދުލްލަތީފް
މިބާވަތުގެ ކަންކަމަށް ސަމާލުކަންދޭންވާނެއެވެ. އަދި ކަންކަން މެދުވެރިވާ ގޮތަކުން ރަނގަޅު ނޫން ގޮތަކަށް ކުރެވުނަސް ކައްފާރާދީ މައްސަލަ ނިންމަންވާނެއެވެ. ކޮންމެ ކަމެއްވެސް ﷲ ތަޢާލާ އަންގަވާފައިވާ ގޮތަށް ކުރަން މަސައްކަތްކުރަންވާނެއެވެ. ކިޔަމަންތެރިވުމަކީ އެއީއެވެ.
ކަމެއް ވަކިގޮތަކަށް ކުރަން ﷲ ތަޢާލާ އަންގަވާނީ އެކަން އެގޮތަށް ކުރުމުން އަހުރެމެންނަށް ފައިދާކުރާނެތީއެވެ. ވީމާ ކޮންމެ ކަމެއްގައިވެސް ބަލަންވީ ﷲ ތަޢާލާގެ ރުހިވޮޑިގަންނަވާނެ ގޮތަށް ކުރެވޭތޯއެވެ. އެއިރުން އެމީހަކަށް ޘަވާބުދެއްވަވާނެތެވެ. އިން ޝާ ﷲ
