އާޝޫރާ ދުވަހަކީ މުޙައްރަމް މަހުގެ 10 ވަނަ ދުވަހެވެ. އާޝޫރާ ދުވަހު ރޯދަ ހިފައިފިނަމަ އެމީހަކަށް ފާއިތުވި އަހަރު ކުރެވިފައިވާ ފާފަތައް ފުއްސަވައި ދެއްވަވާނެ ކަމަށް އުންމީދު ކުރައްވަވާ ކަމަށް ރަސޫލް (ޞޢވ) ވަނީ ޙަދީޘްފުޅު ކުރައްވަވައިފައެވެ. މުޙައްރަމް މަހުގެ 9 ވަނަ ދުވަހަށް ތާސޫރާ ދުވަސްވެސް ކިޔައެވެ.
އާޝޫރާ ދުވަހު ރޯދަ ހިފަން އެދޭ މީހާ މުހައްރަމް މަހުގެ 10 ވަނަ ދުވަހުގެ އިތުރުން އެދުވަހުގެ ކުރިއަށް އޮތް 9 ވަނަ ދުވަހު ނުވަތަ ޖެހިގެން އަންނަ 11 ވަނަ ދުވަހު ރޯދި ހިފުންވެސް ސުންނަތްވެގެންވެއެވެ. މާނައަކީ ފަހަތަށް ނުވަތަ ކުރިއަށް ނަމަވެސް އެއް ދުވަސް އިތުރުކޮށް 2 ދުވަހު ރޯދަ ހިފުމެވެ.
ރަސޫލް (ޞޢވ) މަދިނާއަށް ހިޖުރަ ކުރެއްވެވުމަށްފަހު ޢާޝޫރާ ދުވަހު ރޯދަ ހިފުމަށް މުސްލިމުންނަށް ވަނީ އަމުރުފުޅު ކުރައްވަވައިފައެވެ. އެހެންކަމުން އެއީ ސުންނަތްކަން ގަދަވެގެންވާ ރޯދައެކެވެ.
މުޙައްރަމް މަހުގެ 10 ވަނަ ދުވަސް މިއަހަރު ދިމާވަނީ ސެޕްޓެމްބަރު މަހުގެ 9 ވާ ހޯމަ ދުވަހަށެވެ. އާދީއްތަ ދުވަހާއި ހޯމަ ދުވަހު ނުވަތަ ހޯމަ ދުވަހާއި އަނގާރަ ދުވަހު ރޯދަ ހިފަން މިހާރުން ފެށިގެން ތައްޔާރުވުން ކިތަންމެހައިވެސް މުހިންމުކަން ފާހަގަކުރެވެއެވެ.
