ސަރުކާރުގެ ޚަރަދުތައް ކުޑަކުރުމަށްޓަކައި ސައުދިއަރަބިޔާއިން މިނިސްޓަރުންގެ މުސާރައިން 20 އިންސައްތަ ކުޑަކޮށް އިތުރު ގިނަ ފިޔަވަޅުތަކެއް އަޅައިފި އެވެ.
އެގޮތުން އަލަން ނިންމި ފިޔަވަޅުތަކުގެތެރޭގައި މިނިސްޓަރުންގެ ފޯނު އެލަވަންސް ކަނޑައިލުމާއި ކުރިއަށް އޮތް ދެ އަހަރުން އެއްވެސް މީހަކަށް ސަރުކާރުން އިތުރު ކާރެއް ނުދިނުންވެސް ހިމެނެއެވެ.
މިނިސްޓަރުންގެ އިތުރުން ޝޫރާ މަޖިލީހުގެ މެންބަރުންނަށް ދޭ ބައެއް އިނާޔަތްތަކުންވެސް ވަނީ 15 އިންސައްތަ ކުޑަކޮށްފައެވެ.
ސައުދީ ރަސްގެފާނު ވަނީ މިކަމަށް އެމަނިކުފާނުގެ ޚާއްޞަ ޤަރާރެއް މިހާރު ނެރުއްވައިފައެވެ.
އެ ޤަރާރުގައިވާ ގޮތުން ސަރުކާރުގެ މުވައްޒިފަކަށް އަހަރަކު ޗުއްޓީގެ ގޮތުގައި ލިބޭނީ 30 ދުވަހެވެ. އެއަށްވުރެ ދިގުކޮށް ޗުއްޓީ ނަގާނަމަ މުސާރައެއް ނުލިބޭނެ އެވެ.
