ކުޑަކަނބާ މެދުއަށި މަތީ އެއޮތީ މެދުރި ކުނަލެއް މަތީ
ކުޑަފަރީ ފާތުމަ އިނީ ކައިރީ އެތާ ކުޑަގޮނޑި މަތީ
ރީތި މޮޅުދާރީ ލިބާހެއް ކަސަބު މާޖެހި ފޭލި އަނދެ
ރީތި އަޑަކުން ފަރިހި ކިޔަނީ އަރިޔަކަށް އޮވެ އަށިމަތީ
ހަންއޮމާން ފަތިހަށި ނިކަން ހޯއްދުން ރަނގަޅު ނިޔަނެތި ކަނބާ
ދަންދެބައި ވަންދެން އުފާ ހޯދާނެޔޭ އޮވެ އަށިމަތީ
އަލަމެޓާ ކަށިކެޔޮމެޓާ ކަލިޔާބިރިންޖީ ކާނެޔޭ
ނަލަ ތަށީގައި ކުކުޅު ސުރުވާ ބޯނެޔޭ އޮވެ އަށިމަތީ
އަޑަފިކޮޅު ތިންފައްތަރަށް ލައި ކެފި ގެނެސްދޭ ޚާދިމުން
އަޑަފިއަށް ފަހު ދުންގަނޑެއް ބޯލާނެޔޭ އޮވެ އަށިމަތީ
ފައި މޮޑެން ފާތުމަ އެހެން އިންނާނެޔޭ އަލިވިލުނަކަސް
"ގައިވަރެއް ނެތް" ކުސްތަޅާނޭ އޮވެ ކަނބާ ބުނެ އަށިމަތީ
ހުވަނދު ބުލިބުލި ހެޔޮ ސަމައްތަރު ބޭކަލުން އައިސް ދޭނެޔޭ
ހުވަނދު އުނގުޅައިގެން ވަރަށް ޢިޝްގީ ވެޔޭ އޮވެ އަށިމަތީ
ފަތިހު ނިދައޭ އޮވެ އެހެން ވަރުބަލިވުމުން ކަންނެތް ކަނބާ
ދަތިކަމެއްނެތި މުޅިދުވަސް ނިންމާލައޭ އޮވެ އަށިމަތީ
