ވަރަށް ކުރުކުރުކޮށް މިފާހަގަކޮށްލަނީ ލައިލަތުލްޤަދްރިވިލޭރޭގެ ޘަވާބާއި ދަރުމަ ލިބިގަންނަން އެދޭ މީހާ ކޮންމެހެންވެސް ސަމާލުކަން ދިނުން ވަރަށް މުހިންމު 5 ކަމެކެވެ.
1- ހަނދާނުގައި ބަހައްޓަންވީ ރޭ ފެށެނީ ޢިޝާ ނަމާދުންނޫންކަމާއި މަޣްރިބް ނަމާދުން ކަމެވެ. މިހެން ބުނަން މިޖެހެނީ ރަމަޟާން މަހުގެ ތިންބައިކުޅަ ދެބައި ފާއިތުވެގެންދިއައިރުވެސް ގިނަބައަކަށް ހީވެފައި އޮންނަނީ ރޭ ފެށެނީ އިރުއޮއްސުމުން ކާނެވަރަކަށް ކައި އެހެންވެސް ކަންކަންކޮށް ފެންވަރާ ހަދައިގެން ޢިޝާނަމާދަށް އަންނަ ހަމައިން ކަމަށެވެ. އިރު އޮއްސުމުން ރޭގަނޑަށް ފެށުނު ކަމާއި މަޣްރިބް ނަމާދުގެ ވަގުތު ފާއިތުވެގެން ހިނގައްޖެކަން އެމީހުންނަށް ނުވެސް އެނގޭ ފަދައެވެ.
2- ރަމަޞާން މަހުގެ ފަހު ދިހައިގެ ރޭތަކުގައި (ހިރި/އޮނަހިރި ބެލުމެއް ނެތި) ކޮންމެ ގޮތަކުން ނަމަވެސް ޢިޝާ ނަމާދާއި ފަތިސްނަމާދު ޖަމާޢަތުގައި ކުރާށެވެ! އެއިރުން މުޅި ރޭ ރޭޢަޅުކަންކުރި ކަމުގެ ޘަވާބު ދެއްވަވާނެކަމަށް ޙަދީޘްފުޅުގައި އޮތުމުންނެވެ. މިސްކިތް އެތައް ކިލޯމީޓަރެއް ދުރުގައި ހުންނާތީ މިސްކިތަސް ނައުދެވޭނަމަ ގޭގެ އަހުލުވެރިންގެ މެދުގައި، އަވަށްޓެރި އެކުވެރިންގެ މެދުގައި ޖަމާޢަތް ހަދައިގެން ނަމަވެސް ޖަމާޢަތުގައި ޢިޝާ ނަމާދާއި ފަތިސްނަމާދު ކުރާށެވެ.
ޢިޝާ ނަމާދު ޖަމާޢަތުގައި ކޮށްފި މީހާ ލައިލަތުލްޤަދްރިވިލޭރޭގެ ބަރަކާތުން ބައެއް ލިބިގެންފި ކަމަށް ބުނެވެއެވެ. ވީމާ އެހިސާބުން ހިތްވަރު އިތުރުކޮށް ވީހައި ގިނަ އަޅުކަންކުރަން މަސައްކަތްފަށަންވީއެވެ.
3- އިމާމް މީހާ އާއިއެކު ތަރަވީޙްކޮށް ނިންމާށެވެ!
4- ވީހައިގިނައިން ރޭއަޅުކަންކުރާށެވެ! ޛިކުރުކޮށް ދުޢާކުރާށެވެ!
5- އެމީހަކަށް ކެރިކުޅަދާނަވީވަރަކުން ވީހައި ގިނައިން ޞަދަޤާތްކުރާށެވެ. ލައިލަތުލްޤަދްރި ވިލޭރޭގެ މަތިވެރިކަން އެނގޭ މީހާ އޭނާގެ ހުރިހާ ތަނަވަސްކަން ޤުރްބާންކުރަންވެސް ފަހެއް ނުޖެހޭނެއެވެ!
- އިސްލާމީ ތިލަފަތުގެ ދަރުސަކަން
