ރަމަޟާން މަސް ފަހު ދިހައަށް ފެށި ރެއަކަށްފަހު ރެއެއް އަލްވިދާޢު ކިޔަމުންދަނީއެވެ. މަސް ނިމެނީއެވެ. ކޮންމެރެއަކުވެސް ކުރަން އޮތް ކަމަކީ ވީހައި ގިނަ ހެޔޮ ޢަމަލުތައް ކުރުމެވެ. ދުޢާކުރުމެވެ. ކުރާ ދުޢާގައި ކޮންމެހެން ހިމަނަންޖެހޭނެ ބައެއް ކަންކަން ފާހަގަކޮށްލާނަމެވެ.
- ކުރެވިފައިވާ ފާފަތަކަށް ޢަފޫކުރައްވަވައިދެއްވެވުން
- ނަރަކައިން މިންޖުކުރައްވަވައި ސުވަރުގެ ވައްދަވާ އަޅުންގެތެރޭގައި ލައްވަވައި ދެއްވެވުން
- ކުރާ ދުޢާ އާއި އަޅުކަން ޤަބޫލުފުޅުކުރެއްވެވުން
- ހިތް ޠޯހިރުކުރައްވަވައި ދެއްވެވުން
- ޙިމާޔަތާއި ރައްކައުތެރިކަން ދެއްވެވުން
- ހިތަށް ޝިފާ ލިބި އުފާވެރިކަން ދެއްވެވުން
- ދަތި ޙާލަތުގައި ކެތްތެރިވުމުގެ ބާރު ދެއްވެވުން
- ކުރަން މަސައްކަތްކުރާ ކަންކަން ފަސޭހަކުރައްވަވައި ދެއްވެވުން
- ޙަލާލް ރިޒުޤް އިތުރުކުރައްވަވައި ދެއްވެވުން
ލިސްޓް އެމީހަކު ބޭނުންވަރަކަށް ދިގުކުރަންވީއެވެ. ފާހަގަކޮށްމިލީ އެންމެ މުހިންމު ބައެއް ކަންކަމެވެ. ދުޢާކުރަން ކޮންމެހެން އެންމެ ފަށުވި ޢިބާރާތްތައް ހޯދަން ވަގުތު ނަގާލުމުގެވެސް އެއްވެސް ބޭނުމެއް ނެތެވެ. އެކަމަށް މިހާރަކު ވަގުތެއް ނެތެވެ. އެނގޭ ޢިބާރާތަކުން ދުޢާކުރާށެވެ!
އެންމެ މުހިންމު އެއްކަމަކީ މައިންބަފައިންނަށްޓަކައި ހެޔޮދުޢާކުރުމެވެ. އަނބިދަރިންނަށް، ފިރިންނަށްޓަކައި ހެޔޮދުޢާކުރުމެވެ. އާއިލާގެ މީޙުންނަށްޓަކައި ހެޔޮ ދުޢާކުރުމެވެ.
ގިނަގިނަގިނައިން ދުޢާކުރާ މީހުންދެކެ ﷲ ތަޢާލާ ލޯބިވެވޮޑިގެންވެއެވެ. ދުޢާނުކުރާ މީހުންދެކެ ކޯފާވެވޮޑިގަންނަވައެވެ! ވީމާ ވީހައި ގިނަ ކަންކަމަށް އެދި ވީހައި ގިނައިން ދުޢާކުރަންވީއެވެ. އެކަމަށް މިއަށްވުރެ ވަކިން ފައިދާހުރި ރޭތަކެއް މިއަހަރަކު ބައްދަލެއް ނުކުރާނެއެވެ!
- އިސްލާމީ ތިލަފަތުގެ ދަރުސަކުން
