ރާއްޖެ ކޮވިޑުން ސަލާމަތްވުމަށްވެސް ތިޔާގިވާންވެސް ބޭނުންނަމަ ބޮޑުތަނުން އިޞްލާޙްވާންޖެހޭކަން ޤުރްއާނުން!

ނަޙްލް ސޫރަތުގެ 112 ވަނަ އާޔަތުގައިވަނީ މިފަދައިންނެވެ.

﴿وَضَرَبَ اللَّـهُ مَثَلًا قَرْيَةً كَانَتْ آمِنَةً مُّطْمَئِنَّةً يَأْتِيهَا رِزْقُهَا رَغَدًا مِّن كُلِّ مَكَانٍ فَكَفَرَتْ بِأَنْعُمِ اللَّـهِ فَأَذَاقَهَا اللَّـهُ لِبَاسَ الْجُوعِ وَالْخَوْفِ بِمَا كَانُوا يَصْنَعُونَ﴾ [سورة النحل ١١٢] 

މާނައީ: "އަމާންވެ، ހިތްހަމަޖެހިގެންވާ ރަށެއްގެ މިޘާލުން، ﷲ މިޘާލެއް ޖެއްސެވިއެވެ. ކޮންމެ ދިމާއަކުން ތަނަވަސްވެގެންވާ ގޮތުގައި، އެ ރަށަށް ރިޒުގު އާދެއެވެ. ދެން ﷲ ގެ ނިޢުތްތަކަށް އެ ރަށުގެ މީހުން ކާފިރުވިއެވެ. ދެން އެއުރެން ކޮށްއުޅުނު ކަންތަކުގެ ސަބަބުން ބަނޑުހައިހޫނުކަމާއި، ބިރުވެރިކަމުގެ ފޭރާންލައްވައި، އެކަމުގެ ރަހަ އެއުރެންނަށް ﷲ ދެއްކެވިއެވެ". 

އަޅުގަނޑުމެންގެ މިކުޑަކުޑަ، ޤުދްރަތީ ވަސީލަތްތައް މަދު ރާއްޖެއަށް ނިޢްމަތްތައް ދެއްވެވުމުގައި ﷲ ތަޢާލާގެ ދީލަތިވަންތަކަން ކިތަންމެހައިވެސް ބޮޑެވެ. ހަމައެކަނި ފަސްގަނޑަށް ބަލައިލިއަސް މިކަން ފެންނާނެއެވެ. ވަށައިގެން މޫދު ލޮނު ގޮނޑު އޮތް، ފަހުގައި ލޮނުގެ އަސަރުހުރި ރަށްތަކުގައި އަޅާ މޭވާގެ ރަހަ ދުނިޔޭގެ އެހެންޤަުމުތަކަށްވުރެ މާމީރެވެ. އަނބު، ފޭރު، ފަޅޯ، ކަރާ މިހެންގޮސް ރާއްޖޭގައި ހެއްދޭ ކޮންމެ މޭވާއަކުންވެސް އެކަން ފެނިގެންދާނެއެވެ. 

މަސްވެރިކަމުން ރިޒުޤް ދެއްވަވައެވެ. ފަތުރުވެރިންގެ މަޤްބޫލުކަން ލިބުމުގައި ދުނިޔޭގެ އެއްވަނައެވެ. ނަމަވެސް ޙަޤީޤީ ޙާލަކީ ކޮބައިހެއްޔެވެ؟ މިތިބީ ނިޢްމަތްތަކަށް ކާފިރުވެގެން ނޫން ހެއްޔެވެ؟ ތަނަވަސްކަން ދެއްވެވިވަރަކަށް މިދެވެނީ ﷲ ތަޢާލާ ބާވައިލެއްވެވި ޤުރްއާނާއި ރަސޫލް ﷺ ގެ ސުންނަތާއި ދުރަށް ނޫންހެއްޔެވެ؟ 

ފާއިތުވި 15 ވަރަކަށް އަހަރަށް ބަލައިފިނަމަ ޤައުމުގެ އިޤްޠިޞާދު ކުރިއަރައިގެންދިއަ މިންވަރު ބަލާށެވެ! އެއިގެ ބަދަލުގައިނ ފާއިތުވެގެން މިދާ 15 ވަރަކަށް އަހަރަކީ ޤުރްއާނާއި ސުންނަތާއި އެންމެ ބިޮޑަށް ދުރަށް ދެވުނު 15 ވަރަކަށް އަހަރެވެ. ދުރަށް ދެވުނުވަރުންގޮސް މިހާރު މިގެންދަނީ ﷲ ތަޢާލާގެ ޙުކުމްފުޅުތަކަށް ފައުޅުކަންބޮޑު ގޮތުގައި ގޮންޖަހަމުންނެވެ. 

މިހާރުމިތިބީ ހަމަރަނގަޅަށްވެސް ކޮން ގޮޅިއެއްކަން ބަލައިލުމަށް ހަމައެކަނި މިބަސްކޮޅަށް ވިސްނައިލާށެވެ! 

"ކުޑަ ކުފުރަކީ ކުފުރުގެ ނަމުން ނަން ދެއްވާފައިވާ ފާފަތަކުގެ ތެރެއިން މިއްލަތުން ބޭރުނުވާ ކުފުރެވެ. އެއީ މިޘާލަކަށް ނިޢުމަތްތަކަށް ކާފިރުވުމެވެ." 

﴿إِنَّ الْإِنسَانَ لَظَلُومٌ كَفَّارٌ﴾  [سورة إبراهيم ٣٤]

މާނައީ: "ހަމަކަށަވަރުން އިންސާނާއަކީ އަނިޔާވެރިވުން ބޮޑު، (ނިޢުމަތްތަކަށް) ކުފުރުވުން ގިނަ މީހެކެވެ."

މިއާޔަތަށް އަހަރެމެންގެ ޢަމަލުތައް ފެތޭ މިންވަރާއިމެދު ކޮނަމެ މީހަކުވެސް އަދި ވެރިކަމުގެ ފަރާތުންވެސް ވިސްނައިލުމުން ރާއްޖެއަށް " ބަނޑުހައިހޫނުކަމާއި، ބިރުވެރިކަމުގެ ފޭރާންލާންޖެހި އެކަމުގެ ރަހަ" ދައްކަވާ ސަބަބު އެނގިގެންދާނެއެވެ. 

- މިއަދުނޫހުގެ ކިޔުންތެރިއެއް