އަންހެނަކު ނަމަވެސް ފިރިހެނަކުނަމަވެސް އޭނާގެ ބައިވެރިޔާއަށް ޚިޔާނާތްތެރިވާ މީހަކާއިއެކު އެއްވެސް ގުޅުމެއް ނުބާއްވާށެވެ! "އޭނާކުރި ކަމެއް އޮންނާނީ އޭނާއަށް" ކަމަށް ހީނުކުރާށެވެ! އެފަދަ މީހުންނާއިއެކު އުޅުމުން އޭނާގެ ކިބައިގައި އެހުންނަ ނުބައިބަލި (ފާފަކުރުން) ތިބާއަށް ވާރުތަކުރާނެއެވެ! ތިބާގެ ދިރިއުޅުމަށް އެކަމުގެ އަސަރުކުރާނެއެވެ! ތިބާގެ ދިރިއުޅުން ވެސް ބަރުބާދުވެގެން ހިނގައިދާނެއެވެ.
ތައުބާ ސޫރަތުގެ 119 ވަނަ އާޔަތުގެ މާނައިގައިވެއެވެ.
"އޭ އީމާންވެއްޖެ މީސްތަކުންނޭވެ! ތިޔަބައިމީހުން ﷲ އަށް ތަޤުވާވެރިވާށެވެ! އަދި ތެދުވެރިންނާ އެކުގައި، ތިއަބައިމީހުން ވާށެވެ!"
މިއާޔަތުގައި އެވާ ތެދުވެރިކަން މާނަކުރަންވީ ފައިސާއަށް ތެދުވެރިވުމަށް އެކަންޏެއް ނޫނެވެ. ﷲ ތަޢާލާއަށް ތެދުވެރިންނާއިއެކުގައިވުމަށެވެ.
ތިމާގެ ޙަޔާތުގެ ބައިވެރިޔާއަށް ޚިޔާނާތްތެރިވެ ފާފަތަކަށް އަރައިގަންނަ މީހާ އެތެދުވެރި ނުވަނީ ހަމައެކަނި އޭނާގެ ބައިވެރިޔާއަކަށް ނޫނެވެ. ފާފަ ނުކުރަން އަމުރުފުޅު ކުރެއްވެވި ﷲ ތަޢާލާއަށްވެސްމެއެވެ. އެހެނީ އެއްވެސް މީހަކު ފާފަނުކުރަންވީ އަނބިމީހާ ނުވަތަ ފިރިމީހާއަށް ބިރަކުން ނޫނެވެ! ﷲ ތަޢާލާގެ ޢަޛާބަށް ބިރުންނެވެ.
ޒަވާޖީ ޙަޔާތް ބަރުބާދުވަމުންދާ ގިނަ މީހުންގެ ޙަޔާތަށް ބަލައިފިނަމަ ފެނިގެންދާނީ ނުބައި އަމަލުތައް ކުރާ އެކުވެރިންގެ ސަބަބުން ކައިވެނިތައް ރޫޅެމުންދާތަނެވެ. އެމީހުން އުޅޭގޮތަށް އުޅެން ހަދައިގެން އަމިއްލަ ޢާއިލާ އާއި ދުރުވެވިގެން ނުކުންނަ މައްސަލަތަކެވެ. ނުބައި އެކުވެރިން ނުބައި ޢަމަލުތައް ކުރާތަން ފެނުމުން ތިމާއަށްވެސް ޝައުޤުވެރިވެވި ނުބައި އަމަލުކުރެވެން ފެށުމުގެ ނަތީޖާއެއްގެ ގޮތުން ދިމާވާ މައްސަލަތަކުގައި ކައިވެނި ރޫޅޭތަނެވެ.
ވީމާ ނުބައި އަމަލުތައް ކުރާ އެކުވެރިންނާއި އެއްވެސް މިންވަރަކަށް ގުޅުން ނުބާއްވާށެވެ! އެކަމުގެ ގެއްލުން ތިބާއަށް ފޯރާނި ކޮން އިރަކު ކޮންސިފައެއްގައިކަމެއް ނުއެނގޭނެއެވެ.
- އިސްލާމީ ތިލަފަތުގެ ދަރުސަކުން
