ކޮންމެ ރެއެއްވެސް ނިމެނީ ފަޖުރުލުމުންނެވެ. ފަތިސްނަމާދުގެ ބަންގިއާއިއެކު އަނެއް ދުވަސް ފެށެއެވެ. މިއީ ޚާއްޞަކަމެއް ނޫނެވެ. ކޮންމެ ދުވަހަކުވެސް ކަންތައް ހިނގަމުން އަންނަ ގޮތެވެ. ސުވާލަކީ ފަޖުރުލުމުން ލައިލަތުލްޤަދްރިވިލޭރޭ ނިމޭކަމަށް ﷲ ތަޢާލާ ވަޙީ ކުރެއްވެވީ ކީއްވެގެންހެއްޔެވެ؟
މީސްތަކުންނޭވެ! މިއީ ވަރަށް މުހިންމު ސުވާލެކެވެ. ޖަވާބަކީ:
އަހަރެން ޤަބޫލުކުރާ ގޮތުގައި ރޭގެ ކޮންމެ މިނިޓެއްވެސް އެންމެ ހެޔޮ ގޮތުގައި ބޭނުން ކުރުމަށް އެންގެވުމެވެ. ނަމާދުކުރުމާއި ޤުރްއާން ކިޔެވުމާއި ޛިކުރުކުރުމާއި ދުޢާކުރުމުގައި ރޭގެ ހުރިހާ ވަގުތުތަކެއް ބޭނުންކުރުމުގެ މުހިންމުކަން ބަޔާންކުރެއްވެވުމެވެ.
މީސްތަކުންނޭވެ! އަަހަރެމެންގެ ފައިދާއަށް މެނުވީ ﷲ ތަޢާލާ އެއްވެސް ކަމެއް މިންވަރެއް ނުކުރައްވަވާނެތެވެ. ވީމާ އަހަރެމެންނަށް އޮތީ ބަލައިގަތުމެވެ. ރޭއަޅުކަމުގައި ވީހައި ގިނަ ވަގުތުތައް ހޭދަކޮށް ލަައިލަތުލްޤަދްރިވިލޭރޭގެ ބަރަކާތާއި ޘަވާބު ލިބިގަންނަން މަސައްކަތްކުރުމެވެ.
ފަރުވާތެރިވާށެވެ! މިއީ ގިނަގިނައިން ލިބެން އޮތް ފުރުޞަތެއް ނޫނެވެ. އަހަރަކު އެންމެ ފަހަރަކު އެންމެ ރެއަކު ދެއްވަވާ ފުރުޞަތެކެވެ. މިއަހަރު އެ ފުރުޞަތު ނަގާލައިފިނަމަ އެމީހަކަށް އަލުން އެފުރުޞަތު ނުލިބިދާނެކަމަށް ބިރުވެތިވާށެވެ.
- ޝައިޚް އަބޫބަކުރު ޒައުދުގެ ދަރުސަކުން
