އަހަރެމެންގެ ވަށައިގެން މިވަނީ މައްސަލަތައް ފުނިޖެހިފައެވެ. އަބަދުވެސް އުޅެންމިޖެހެނީ ކަންކަމުން ސަލާމަތްނުވެވިގެންނެވެ. ދިރިއުޅުމަށް ހުރަސްތައް އެޅޭއިއރު އެކަންކަމުން ސަލާމަތްނުވެވިގެންނެވެ.
އަހަރެމެން ޢާންމު ދިރިއުޅުމުގައި ބޭނުންވާ ފޯނު ފަދަ ތަކެތި ގަންނައިރު ވޮރަންޓީ ކާޑުގައި ހުންނަ މައުލޫމާތަށް އެބަ އިތުބާރު ކުރަމުއެވެ. ފޯނު އުފެއްދި ކުންފުނީގެ މީހަކު ބުނުމަކާއި ނުލައި ހަމައެކަނި ފިހާރައިގެ ސޭޓު ދައްކާ ކަރުދާސްކޮޅެއްގައިވާ ލިޔުމަކަށް ބަލައިގެންނެވެ.
އެހެން ނަމަވެސް ކީރިތި ޤްރްއާނުގައި ބަޔާންވެގެންވާ ﷲ ތަޢާލާގެ އާޔަތްތަކަށް އިތުބާރެއް ނުކުރަމުއެވެ. އެހެން މިބުނަނީ ޤަބޫލުނުކުރެވޭތީއެވެ. ޤަބޫލުކޮށް އިތުބާރުކުރާނަމަ ކީރިތި ޤްރްއާނުގެ އާޔަތްތަކަށް ޢަމަލުކުރާނެއެވެ. ނަމާދުކުރަންޖެހޭކަން ޤަބޫލު ކުރާނަމަ ނަމާދުކުރާނެއެވެ.
އަބޫޠާލިބްގެފާނަށްވެސް ކުރިމަތިވީ ހަމަ އެމައްސަލައެވެ. ކައު އިތުރު ރަސޫލާ މުޙައްމަދު (ﷺ) ބަސްފުޅުތަކަކީ ސާފު ސީދާ ތެދު ބަސްފުޅުކަން އެނގިވަޑައިގެންނެވިއެވެ. ނަމަވެސް ޤަބޫލުފުޅު ނުކުރެއްވެވުނީއެވެ.
ﷲ ތަޢަލާ ވަޙީކުރައްވަވާފައިވަނީ ނަރަކައަށް ބިރުގަންނަ މީހުން ނަރަކައިން ސަލާމަތްވާނެ ކަމަށެވެ. ނަރަކައަށް ބިރު ގަންނާނީ ތަޤްވާވެރިންނެވެ. ތަޤްވާވެރިންނަކީ ﷲ ތަޢާލާ ނަހީ ކުރެއްވެވި ކަންކަން ނުކުރާ އަދި ﷲ ތަޢާލާ އަމުރު ކުރައްވަވާފައިވާ ކަންކަން ކުރާ މީހުންނެވެ. ވީމާ ނަރަކައިން ސަލާމަތްވާނީ ކޮން ބައެއްކަން މިއޮތީ އެނގޭށެވެ.
އަހަރެމެން އަޅުކަން ކުރަނީ ކީއްކުރަން ހެއްޔެވެ؟ ހިތަށް ބިރުވެރިކަން ގެނައުމަށެވެ. ކިޔަމަންތެރިކަމުގެ އަށަގެންނެވުމެވެ. ނުކިޔަމަންތެރިކަމާއި ދުރުވުމެވެ. ތަޤްވާވެރިވެވޭނީ އެއިރުންނެވެ.
- ސްލާމީ ތިލަފަތުގެ ދަރުސަކުން
