އަހަރެމެން ރަމަޟާން މަހު ރޯދަ ހިފައިފީމުއެވެ. މުޅި ދުވަހު ނުކައި ނުބޮއި ތިބެފީމުއެވެ. ވީއިރު ބޭރުން އައިސް ގެއަށް ވަންނައިރު މޭޒުމަތީގައި ކާންހަދާފައި ނެތިގެން ރުޅިއައިސް ހަމަނުޖެހުން އުފައްދަންވީ ކީއްވެގެން ހެއްޔެވެ؟
ބުނެލަން އޮތީ ރަމަޟާން މަހަށްފަހު މިފަދަ ކުދިކުދި ކަންކަމުގައި ރުޅިއާދެވޭނަމަ ރަމަޟާންމަހުން އެމީހަކަށް ކުރި އެއްވެސް ފައިދާއެއް ނެތްކަމަށެވެ. ލިބިގަނެވުނު ފިލާވަޅެއް ނެތްކަމަށެވެ.
އަބަދުވެސް މިބުނާ ފަދައިން އަޅުކަމަކީ ހަމައެކަނި ދީނުގެ ފަރުޟުތައް އަދާކުރުމެއް ނޫނެވެ. ސުންނަތުގައި ހިފަހައްޓާ މީހަކު ނަމަ ދެންމެ މިބުނި ފަދަ ކަންކަމުގައި ރުޅިއެއް ނުއަންނާނެއެވެ. ބަލާނީ ކައްކާފައި ހުރިނަމަ ނަގައިގެން ކެއުމަށެވެ. ކައްކާފައި ނެތްނަމަ އެހެން ގޮތަކުން އެކަން ޙައްލުކުރުމަށެވެ.
މިސާލަކަށް އެއްގޮތަކީ އަމިއްލައަށް ލުއިއެއްޗެއް ނަމަވެސް ތައްޔާރުކޮށްލައިގެން ކެއުމެވެ. އެކަން މިހާރުމިވަނީ ވަރަށް ފަސޭހަވެފައެވެ. ހުސް ހޫނުފެންފޮދަކަށް އަޅައިލުމުން 2، 3 މިނިޓް ތެރޭގައި ކައިލެވޭ ތަކެތި ބައިވަރެވެ.
އަނބިމީހާ ހުރީ ކައިގެންތޯވެސް ބަލައިލާށެވެ! ނުކައި ހުރިނަމަ އަނބިމީހާއަށްވެސް އެތިކޮޅެއް އިތުރުކޮށްލާށެވެ! ދެމީހުން އެކުގައި ކައިލާށެވެ! އެއިރުން އެކަން ބަދަލުވެގެންދާނީ މަތިވެރި އަޅުކަމަކަށެވެ! އެއިގެ ބަދަލުގައި ރުޅި އައިސް މޫނުކުނިކޮށް ހުތުރު ބަސްތައް ބުނާނަމަ އެކުރެވެނީ ފާފައެވެ. އެދެވެނީ ޝައިޠޯނާގެ މަގުންނެވެ.
- އިސްލާމީ ތިލަފަތުގެ ދަރުސަކުން
