މާލެ ސިޓީގެ މިސްކިތްތަކުގައި މިއަދުގެ ޢަޞްރުނަމާދަށްފަހު އިސްލާމިކް މިނިސްޓްރީން ވަކިގޮތަކަށް އަންގަންދެން ޖަމާޢަތުގައި ނަމާދުކުރުން މެދުކަނޑާލިކަން އިއުލާނުކުރުމުން، އެއީ ވާނެ ކަމެއްކަން ކުރިންސުރެ އެނގިތިބުމާއިއެކުވެސް ގިނަބައެއްގެ ލޯތަކުން ކަރުނައޮހޮރެންފެށިއެވެ. އަދި ނަމާދު ނިންމާފައި މިސްކިތުން ފޭބީ އަސަރާއިއެކު ކަރުނައަޅަމުންނެވެ.
ބައެއް މީހުން ބުނީ ޖަމާޢަތުގައި ނަމާދު ނުކުރެވުނު ނަމަވެސް މިސްކިތްތަކުގައި ތިބޭނެ ކަމަށާއި ﷲ ތަޢާލާގެ ގެކޮޅުތައް ފަޅުވާން ދޫނުކުރާނެ ކަމަށެވެ.
މިއަދަކީ ރަމަޟާން މަހުގެ ފަހުދުވަސްކަމަށްވެފައި މިރޭގެ މަޣްރިބް ނަމާދަށް މިސްކިތަށް ނުދެވޭނެތީ ރޯދަ ވީއްލުމަށް ދަތިތަކެއް ކުރިމަތިވާނެ ގިނަ ބައަކު ތިބޭނެތީ ވިޔަފާރިވެރިންގެ މިސްކިތުގައި މިއަދުގެ ޢަޞްރު ނަމާދަށްފަހު ވަނީ ޖޫސްޕެކެޓާއި ކަދުރާއި ބޯފެންފަދަ ތަކެތި ބަހައިފައެވެ. އަދި މިއީ 6 ރޯދަ ތެޜޭގައިވެސް ހުރިހާ މިސްކިތެއްގައިވެސް ކުރެވިދާނެ ކަމެއްކަންފާހަގަކުރެވެއެވެ.
