މިއަހަރުވެސް ގިނަ ޤައުމުތަކެއްގައި ވަނީ ޢީދުގެ ބޮޑުޖަމާޢަތުގައި ނަމާދު ކުރެވޭނެ މަގު ތަނަވަސްނުވެފައެވެ. އެހެންކަމުން މިއަހަރުވެސް މުސްލިމުންގެ ގިނަބައަކަށް މިވަނީ ޢީދު ސަލާމް ކުރެވޭނެ ގޮތް ނުވެފައެވެ.
މިއީ ވަރަށް ހިތްދަތި ޙާލަތެކެވެ. ޢީދު ނަމާދަށް ނަލަހެދިލައިގެން މީރުވަސްދުވާ ސެންޓުޖަހައިގެން ޖަމާއަތަށް ގޮސް ނަމާދުކޮށްލުމަށްފަހު ވީހައި ގިނަބައަކާއި ބައްދަލުކޮށް ސަލާމްކުރަން މުސްލިމުން އިންތިހާއަށް ބޭނުންވެއެވެ.
ކޮންމެއަކަސް ޖަމާޢަތުގައި ނަމާދުކުރެވެން ނެތް ޤައުމުތަކުގައި މި އުފަލުން މުސްލިމުން މިވަނީ މިއަހަރުވެސް މަޙްރޫމްވެފައެވެ. ނަމަވެސް މާޔޫސްނުވާށެވެ!
ފުރަތަމަ ކަމަކަށް ހެނދުނު ހޭލެވުމުން އަވަހަށް ފެންވަރައިގެން ރީތިވާށެވެ! ރީތިފޭރާންލައި ސެންޓުވެސް ޖަހާށެވެ! ކަދުރުއޮށެއް ނުވަތަ ކޮންމެވެސް އެއްޗެއް ކއިލާށެވެ! އެއަށްފަހު ގޭގެ އަހުލުވެރިން ގޭގައި ޖަމާޢަތުގައި ޢީދުނަމާދުކޮށްލާށެވެ! އެގޮތަށް ކުރެވެން ނެތްނަމަ އެކަނިވެސްކޮށްލާށެވެ! މިޙާލަތުގައި ކުރާއިރު ޚުޠުބާ އާއި ނުލައި ކުރަންޖެހުމަކީވެސް މައްސަލައެއް ނޫނެވެ.
ދެން އޮތީ ސަލާމް ކުރުމެވެ. ބައްދަލުކުރެވެން ނެތިގެން ސަލާމްކުރެވެން ނެތްހާލަތުގައި މިހާރުކުރަން އޮތްކަމަކީ ސަލާމްގެ މެސެޖުތައް ފޮނުވުމެވެ. ހެޔޮ ދުޢާ އާއިއެކު ސަލާމްގެ މެސެޖުތައް ފޮނުވާށެވެ! ޢާއިލާގެ އެންމެންނަށާއި އެނގޭ އެންމެންނަސްވެސް ފޮނުވާށެވެ!
އަހަރެމެންނަށް މިއަދު އުޅެންޖެހިފައިވާ ޙާލަތު ﷲ ތަޢާލާ ދެކެދެނެވޮޑިގެންވެއެވެ. ވީމާ ޘަވާބު ނުލިބިދާނެކަމަށް ހިތާމަކުރުމެއް ނެތެވެ.
- އިސްލާމީ ތިލަފަތުގެ ދަރުސަކުން
ޢީދު ނަމާދުކުރަންވީ ގޮތް ޙަދީޘުން:
https://islamqa.info/en/answers/36491/description-of-eid-prayer
