މުޅި ދުނިޔެއަށްވެސް މިވަގުތު ކުރިމަތިވެފައި މިވަނީ އެންމެ ހިތްދަތިކަން ބޮޑު ޙާލަތެވެ! އެއްކޮޅުން ކޮވިޑްގެ ނުރައްކައުތެރިކަން ދަނީ އިތުރުވަމުންނެވެ. އިންޑިއަން ވޭރިއަންޓް މިވަނީ މިހައިތަނަށް ހޯދުނު ވެކްސިންތައް ފޫއަޅުވާލައިފައެވެ. ބަލީގައި މަރުވާ މީހުންގެ ނިޞްބަތް ދަނީ ދުވަހުން ދުވަހަށް އިތުރުވަމުންނެވެ.
ހަމައެއާއިއެކު ލޮކްޑައުންވާންޖެހުމުން މަސައްކަތްތައް ހުއްޓި، ވިޔަފާރިތަކަށް ބޮޑެތި ގެއްލުންތައް ލިބި ލިބޭ އާމްދަނީ އެންމެންނަށްވެސް މިވަނީ މަދުވެފައެވެ. ވީމާ މިވަގުތު ކުރަން އޮތް އޮން އެންމެ މުހިންމު އެއްކަމަކީ ތައުބާވުން ގިނަކޮށް ލިބޭ މަދު އާމްދަނީގައި ބަރަކާތް ލެއްވެވުން އެދި ދުޢާކުރުމެވެ.
އެކަމަށްޓަކައި އެންމެ ގިނައިން ކުރަން އޮތް ކަމަކީ އަސްތަޣްފާރުކުރުން ގިނަކުރުމުންނެވެ. އަސްތަޣްފާރުކުރުން ގިނަކުރުމަކީ ލިބޭ އާމްދަނީގައި ބަރަކާތް ލައްވަވާ ކަމެކެވެ. ކިތަންމެ މަދުން އާމްދަނީ ލިބުނު ނަމަވެސް އެއިގައި ﷲ ތަޢާލާ ބަރަކާތް ލައްވަވައިފިނަމަ މަދުވެގެން އުޅޭކަށް ނުޖެހޭނެއެވެ.
އަހަރެމެން ކޮންމެ މީހަކީ ދުވާލަކު 100 ފަހަރު އަސްތަޣްފާރުކުރަންޖެހޭ މީހެކެވެ. މިޙާލަތުގައި އަސްތަޣްފާރުކުރުން ގިނަކުރާށެވެ! ދުވާލަކު 1000 ފަހަރުވެސް އަތަޣްފާރުކުރާށެވެ!
އަސްތަޣްފާރުކުރުމަކީ ހަމައެކަނި މާލީ ތަނަވަސްކަން އިތުރުކުރަން ކުރަން އޮތް ކަމެއް ނޫނެވެ. ކޮވިޑާއި އެހެން ބަލިތަކުންވެސް ރައްކައުތެރިކަން ލިބި ޞިއްޙީ ދުޅަހެޔޮކަން ލިބުމަށްވެސް ކުރަން އޮތް އެންމެ ރަނގަޅު ޢަމަލެވެ. ވީމާ ވީހައި ގިނައިން އަސްތޣްފާރުކުރަމުން ގެންދާށެވެ. ބޭނުންވާ ޞިއްޙީ ރައްކައުތެރިކަމާއި މާލީ ތަނަވަސްކަންވެސް މިންވަރުކުރައްވަވާނެތެވެ. އިން ޝާ ﷲ
- އިސްލާމީ ތިލަފަތުގެ ދަރުސަކުން
