ފަތިސް ނަމާދަށް ނުހޭލެވުނު ނަމަވެސް މެންދުރުނަމާދާއިއެކުގައި ފަތިސްނަމާދުކުރަން މަޑުކުރަން ހެޔޮނުވާނެއެވެ! އެހެނީ ސުންނަތުގައި ހޭލެވުމާއިއެކު އިހު ސުންނަތާއި ފަތިސްނަމާދު ވީހައި އަވަހަކަށް ކުރުމެވެ.
ދެވަނަ ކަމަކީ މެންދުރު ނަމާދާއިއެކުގައި ކުރާނަމަ މެންދުރު ނަމާދުގެކުރިން ފަތިސްނަމާދުގެ އިހު ސުންނަތާއި ފަތިސްނަމާދުކުރަން އެބަޖެހެއެވެ. އެއީ 4 ރަކްއަތެވެ. އެއިގެ ފަހުން އިހު ސުންނަތުގެ 4 ރަކްތާއާއި މެންދުރު ނަމާދުގެ 4 ރަކްޢަތާއި ފަހު ސުންނަތުގެ 4 ރަކްޢަތް ކުރަން އެބަ ޖެހެއެވެ.
ވީމާ ޖުމުލަ 16 ރަކްޢަތްކުރަން އެބަޖެހެއެވެ. އެއީ ކުޑަ ކަމެއް ނޫނެވެ. ޚުޝޫޢަތްތެރިކަމާއިއެކު ނަމާދުކުރާ މީހަކަށް އެއްފަހަރާ މިހައި ގިނަ ރަކްޢަތްކުރަން ފަސޭހައެއް ނުވާނެއެވެ.
3 ވަނަ ކަމަކަށް ދުވަސް ފަށަން އޮތީ ފަތިސް ނަމާދުންނެވެ. މެންދުރު ނަމާދުވަގުތުވަންދެން ފަތިސްނަމާދުނުކޮށް އެހެންކަންކަމުގައި އުޅުމުން ދުވަސް ފެށީ ފަތިސްނަމާދުން ކަމަކަށް ނުވާނެއެވެ.
ހަމައެކަނި މި 3 ސަބަބަށް ބަލައިލި ނަމަވެސް އޮތީ ފަތިސްނަމާދުގެ ވަގުތުގައި ކަމެއް ދިމާވެގެން ނުހޭލެވުނު ނަމަވެސް ނިދީން ހޭލެވުމާއިއެކު ފަތިސްނަމާދުގެ އިހު ސުންނަތާއި ފަތިސްނަމާދުކުރަން އަވަސްވެގަތުމެވެ. މުޅި ދުވަހު ﷲ ތަޢަލާގެ ރައްކައުތެރިކަމުގައި ހުރުމުގެ ފުރުޞަތު ލިބިގެންދާނީވެސް އެއިރުންނެވެ. އިން ޝާ ﷲ
- އިސްލާމީ ތިލަފަތުގެ ދަރުސަކުން
